16-anyos patay sa 'gang war', 2 angol apil enforcer

CEBU, Philippines - Patay ang 16-anyos nga batan-on ug laing duha ang naangol apil na ang usa ka traffic enforcer sa nahitabong pagpamusil sa National Highway sa barangay Cansaga sa lungsod sa Consolacion niadtong Lunes sa alas 10:40 sa gabii.

Ang biktima nga patay diha diha mao si Johnrey Padilla alyas Eboy, 16, ug ang naangol mao ang laing 16 anyos nga molupyo usab sa nahisgutang lugar ug gituohang mga sakop sa Crips Gang.

Samtang napagan usab ang Traffic Enforcer sa maong lungsod nga si Jeffrey Quapo, 29, taga Poblacion kinsa nagpalit og load sa cellphone diha sa usa ka tindahan nga gitagoan sa usa sa mga biktima.

Usa sa duha ka suspek ang nailhan lang sa pangalan nga Bambam Tagalog, molupyo sa barangay Jagobiao siyudad sa Mandaue nga daling nakaikyas uban sa lain pang lalaki luwan sa motorsiklo.

Matud pa ni PO3 Allen Garciano, desk officer sa Consolacion Police Station dihang nahinabi sa Banat News mibutyag nga ang mga biktimang batan-on naglakaw sa maong dapit padulong na mamauli.

Apan kalit lang usa ka motorsiklong giluwanan sa duha ka mga lalaki nga usa kanila giila human sa hitabo nga mao si Tagalog, midiretso og pamusil sa duha.

Si Padilla naagtang sa bala ug nahagba dayon, tungod niini mikaratel og dagan ang 16-anyos nga higala niini ug mitago sa usa ka tindahan apan gisundan kini sa mamumuno ug gisigehan og pusil hangtud nga naigo sa walang bahin sa lawas.

Si Quapo kinsa diha usab sa maong tindahan napagan dihang naigo kini sa bala diha sa iyang tiil.

Ang mga nangaangol gihatud dayun sa tambalanan ug padayon pang giatiman sa mga doktor.

Usa ka saksi ang positibong mitumbok sa usa sa mga suspek nga alyas Bambam sakop sa karibal nga grupong Bloods Gang ang responsable sa krimen.

Sa paghimo ning balita ang kapulisan pinangulohan sa hepe nga si Chief Insp. Teodolfo Manatad III padayon pang naggukod sa mga suspek. - BANAT NEWS