Kalunasan motabang sa nadasmagan; koleksyon sa basura maapektahan - Leyson

CEBU, Philippines - Gawas sa hinabang gikan sa dakbayan sa Sugbo, mohatag usab og hinabang ang mga opisyales sa barangay Kalunasan ngadto sa mga biktima nga naligsan sa trak sa basurahan sa milabay nga adlaw.

Sumala pa ni barangay Konsehal Marvin Leyson nga mohatag gyud sila og ayuda sa mga biktima gumikan kay ilaha kining responsibilidad ilabi nga drayber sa barangay ang nakadasmag niini.

Samtang nangayo og pagsabot sa ilang mga konstituwente ang mga opisyales kung dunay higayon nga malangan pagkuha ang ilang mga basura tungod kay usa na lang ang ilang garbage truck nga nagdagan.

Niadtong milabay’ng semana nadisgrasya ang garbage truck nga hinulman sa barangay diha sa Department of Public Service (DPS) nga miresulta sa kamatayon sa duha ka tawo ug pagkaangol sa pito.

Samtang liboang kantidad sa kabtangan ang nadanyos human usa ka shop ug kapin sa 20 ka motorsiklo ang gidaro sa maong trak.

Ang drayber sa trak nga si Gerardo Lasangi nangangkon nga gubaon ang brake niini maong nawad-an siya og kontrol maong nahitabo ang disgrasya.

Apan sa report sa TV Patrol Central Visayas usa ka adlaw human sa maong aksidente usa ka drayber sa DPS ang mipamatuod nga walay depekto ang brake sa maong trak gani nakuhaan sa footage ang pag-atras abante niini nga mipaak gyud ang brakes.

Mismong si Mayor Michael Rama dili makatuong gubaon na ang brakes niini sanglit brand new kini pagkapalit. Si Rama mimando nang dili na pahuwaman ang mga trak sa DPS ngadto sa kabarangayan kun maguba ang ilang mga trak.

Buot nalang sa mayor nga ipahuwam ang trak apan ang momaneho niini ang drayber gyud sa DPS ug dili gikan sa barangay.

Kabahin sa kakuwangon sa garbage truck nga makahakot og basura gipasalig ni Leyson nga masulbad ra ang maong problema kay misaad og tabang ang dakbayan.

 “Masaligon hinuon mi sa City nga motabang sila og kolekta sa mga basura sa among barangay. Hinaut nga masabtan sa mga tawo ang sitwasyon karon,” nagkanayon si Leyson.

Nanghinaut si Leyson nga maabot na sulod karong buwana ang gipalit sa baranga nga garbage truck.

“Kabahin usab sa among drayber, among paaboton ang dagan sa imbestigasyon,” matud pa ni Leyson.

Samtang ang hepe sa DPS nga si Engr. Dionisio Gualisa mipadayag nga iya na nga gitugyan sa mga Traffic Division ang pag-imbestigar kang Lasangi.

Si Lasangi nag-atubabang sa kasong “reckless imprudence resulting to double homicide” ug “multiple physical injuries” ug damage to properties.

Sa pagkakaron gipamawi na sa DPS ang ilang mga unit nga gipang-uslan sa mga barangay. Matud pang Gualisa tulo ka garbage trucks ang gihulman sa mga barangay apan tungod sa nahitabo gibakwi na kini.

Giawhag hinuon niya ang mga opisyales sa barangay nga motawag lang sa ilang buhatan kung magkinahanglan og igong puwersa sa pagpangolekta sa ilang basurahan. (BANAT NEWS)