Tulo ka polis sa Danao relibohan

CEBU, Philippines - Tulo ka pulis sa Danao ang gipang-relibo sa ilang hepe human nakit-an niini nga adunay portable television set sulod sa karsel ang gipasanginlang notadong drug pusher nga si Florita Dalumpines.

Matud pa ni Police Chief Inspector Eddie Recamara nga girelibohan dayon niya sila si SPO4 Edgar Gomez, PO2 Marlon Remollo sa Kababayan Center sa may Mitsumi Danao ug PO3 Matias Galo ngadto sa Mobile Patrol nga pulos nagsilbing desk officers.

Neglect of duty ang nakitang rason sa pagrelibo kanila human nga iya mismong nasakpan sa iyang pag-inspeksyon ang karsel ni Dalumpines tungod sa nadawat niyang impormasyong nag-enjoy kini og TV sa sulod.

    Matud pa niya wala siyay gitugutan makadala og TV sa ilang karsel bisan na kang Dalumpines ug hugot usab ang inspection nga buhaton ang mga jailguards kada adlaw. Kahinumduman nga si Dalumpines nadakpan niadtong miaging semana sa operasyon sa Provincial Anti-Illegal Drugs Special Operation Task Group (PAIDSOTG) human siya makuhai og pipila ka pakete sa shabu nga nagkantidad og P5,000.

    “All chief of police know that. Dapat way pinalabi sud sa prisohan,” matud pa ni Provincial Police Director Sr. Supt. Erson Digal niini sa The Freeman dugang sa pag-ingong iyang ipaimbestigar kinsay nagpalusot sa maong portable television. (BANAT NEWS)