Vendor giluba kritikal

CEBU, Philippines - Kritikal ang kahimtang sa usa ka tindero og ice cream human kini dunggaba sa igsoon sa iyang customer nga iyang gikalalis samtang kini didto sa peryahan sa barangay Tabok ,siyudad sa Danao niadtong Miyerkules sa gabii.

Ang biktima mao si Nick Roxas Guinita, 28, minyo, nga taga barangay San Jose, lungsod sa Catmon ug usa ka manindahay og ice cream samtang ang suspek giila lang sa ngalang Bongbong Roble, hingkod, nga taga barangay Tabok sa maong dakbayan.

Si SPO2 Matias Galo, desk officer sa Danao City Police mibutyag sa Banat News nga ang biktima samtang naninda sa iyang ice cream sa may peryahan, gikalalis niini ang ginganlan og Ulysses Roble nga maguwang sa suspek.

Dihang magsinumbagay na unta sila, nakita kini sa suspek kinsa dali kaayong milaban sa iyang igsoon nga si Ulysses ug maoy milipot sa biktima dayon gihansakan sa iyang kutsilyo ang buko-buko niini.

Human mahagba ang biktima sa yuta, dali kaayong nakasirit og dagan pahilayo sa maong lugar ang suspetsado busa wala kini hidakpi sa kapolisan.

Ang biktima gihatud dayon ngadto sa Danao City District Hospital apan gi-transfer usab dayon kini sa tambalanan sa dakbayan sa Sugbo gumikan sa katalandugon sa kahimtang niini. (BANAT NEWS)