Mga suspetsado nahadlok ihawon

CEBU, Philippines - Ang duha ka suspetsado sa kamatayon sa Marine Watch sa lungsod sa Cordova nabalaka sa ilang kinabuhi kun adto sila ipaslak sa prisohan sa Cordova.

Sila si Luis Fernandez ug Felipe Dongcoy Yongco mihangyo nga adto lang sila magpapriso sa Talisay City Jail aron masiguro nga dili sila ihawon didto.

Ang ilang gihangyo mao si barangay kapitan Doroteo Emit kinsa mao usay mipadangat niini ngadto sa kapolisan sa Cordova.

Hinuon si Senior Inspector Felix Pacaldo, hepe sa kapolisan sa lungsod sa Cordova mipadayag usab og   susamang kabalaka sa mahitabong kagubot sa higayon nga itanggong sa detention cell sa Cordova sila si Fernandez ug Yongco.

Matud pa ni Pacaldo nga init pa kaayo ang buot sa mga kabanay ni Rodrigo Rudy Sultan kinsa namatay human   dakpa sila si Fernandez ug Yongco kinsa illegal nga nanagat sa kadagatan sa Cordova.

Gipasabot hinuon ni Pacaldo nga iyang giagad ang hukom sa labaw niyang opisyal sa kapolisan sa lalawigan nga si Senior Superintendent Erzon Digal sanglit kun unsay kamandoan ngadto kaniya andam man usab siya sa pagtuman.

Si Mayor Adelino Sitoy sa lungsod sa Cordova mipadayag usab   og kasagmuyo kalabot sa pagpabilin nila ni Fernandez ug Yongco sa bilanggoan sa Talisay. Gitataw ni Mayor Sitoy nga ang husto untang himoon mao ang pagpaslak sa duha   ka suspetsado sa prisohan sa Cordova kay didto man mahitabo ang krimen ug dili kay sa Talisay City jail.  - BANAT NEWS