Pinatyanay, sinamaray sa pasko asawa gipusil patay sa iyang bana

CEBU, Philippines - Patay ang usa ka 37-anyos nga asawa human kini unaya sa pagpusil sa iyang bana niadtong Biyernes sa gabii sulod sa ilang balay sa sitio Don Andres Soriano (DAS), Lutopan, dakbayan sa Toledo.

Ang biktima kinsa nakaangkon og usa ka samad pinusilan sa ulo mao si Magdalina Cunsan Largo, 37, samtang ang suspetsado mao si Rolando Largo, 60, bana sa biktima. Base sa imbestigasyon ni PO3 Alfredo Barquin sa Toledo Police Station nasayran nga ang magtiayon nagtipon sulod na sa napulo ka tuig nga gapunay lang og away. Sa wala pa mahitabo ang pagpamusil ang biktima bag-ong nauli gikan sa iyang biyahe gikan sa lungsod sa Tuburan. Apan giingong pag-abot niini nagkalalis ug ang iyang bana, ug mao nalay nabati sa mga silingan ang buto sa armas de fuego ug dihang ilang gisusi patay na ang biktima nga naglunang sa iyang dugo. Misibat usab dayon ang suspetsado nga maoy gipangita karon sa kapolisan.

Sa laing bahin, usa ka menor de edad ang nabiktima usab sa pagpamusil niadtong Sabado sa kadlawon sa D. Macapagal Highway, barangay Poblacion, dakbayan gihapon sa Toledo. Ang biktima mao si Robin Espadilla, residente sa maong lugar kinsa nakaangkon og samad pinusilan sa ibabawng bahin sa tuo niyang tiil.

Si Espadilla ang giingong uban sa iyang mga higala nga nag-estambay atubangan sa fastfood chain sa ilang lugar dihang kalit lang silang giatake sa laing grupo sa mga batan-on.

Si Espadilla ug ang iyang upat ka mga higala giingong gipangkulata sa nahisgutang mga batan-on samtang usa niini ang milanit og pusil dayong luthang ngadto sa biktima.

 Sa lungsod sa San Fernando usa ka pasahero sa multicab kinsa giingong nagdala og pusil ang napusilan sa polis niadtong Biyernes sa gabii sa barangay Panadtaran.

Ang suspetsado mao si Pedro Cuntad Sedello, 29, taga barangay Tinaan, dakbayan sa Naga kinsa nakaangkon og samad pinusilan sa tuong tiil human kini pusila ni PO3 Glen Burlas. Si Ramil Talara, taga barangay Bagacay lungsod sa Barili, drayber sa pasaheroang multicab gibati og kahadlok hinungdan nga mitawag ngadto sa San Fernando Police Station ug nangayo og panabang tungod sa usa ka pasahero nga misakay kaniya diha sa Panadtaran nga nagdala og pusil. Si PO3 Burlas daling miresponde sa maong alarma ug pag-abot sa lugar mipasalipod kini sa likod nga bahin sa multicab ug nagpaila nga polis ngadto sa suspetsado.

Ang suspetsado kinsa nanaog na sa sakyanan midagan paingon ngadto sa merkado publiko hinungdan nga nahitabo ang ginukdanay.

Gikataho nga ang suspetsado unang namusil kang PO3 Burlas apan wala maigo ang polis. Apan usa ka estambay ang natapsingan sa tuong abaga sa bala ug gidala kini ngadto sa Carcar District Hospital.

Si PO3 Burlas mipabuto og duha ka warning shot aron mohunong si Sedello apan wala mamati ang suspetsado hinungdan nga gipusil ni PO3 Burlas ang tiil niini.

Nagpatingog kusog sa sound system gipatay

Ni Brenda Batuto

Gumikan sa sipa nga tingog sa sound system, gidunggab patay ang usa ka 28 anyos didto sa barangay Lamac, lungsod sa Pinamungahan niadtong miaging Sabado sa kaadlawon, adlaw sa Pasko.

Ang biktima mao si Joseph Naparate, 28 anyos, nga taga Lamac, samtang ang suspetsado nailhan usab nga si Junever Bungco, 24, silingan ra usab sa biktima.

Sumala sa kapolisan nga   sa wala pa ang pagpanunggab, nagkalalis ang duha gumikan kay napungot ang suspetsado tungod sa kasipa sa tingog sa sound system nga gipatingog   sa biktima. Ang suspetsado kinsa nahutdan na sa pailob, milanit sa iyang kutsilyo ug gihansak sa nagkalainlaing bahin sa lawas sa biktima nga maoy hinungdan sa hinanaling kamatayon niini.

Dihang nakita sa suspetsado nga mibay-ad na sa yuta ang biktima ug mibanaw ang daghang dugo gikan sa lawas niini, dali kaayong nakasibat ang suspetsado ug gipangita pa hangtod karon sa kapolisan.

Sa mao gihapong adlaw, nalandig sa Danao District Hospital ang usa ka lalaki human kini tigbasa sa iyang kontra didto sa sitio San Antonio, barangay North Guinsay, dakbayan sa Danao.

Ang biktima mao si Anecito Hermoso Reston, 33, taga dalan Lapulapu, barangay Suba sa maong dakbayan, samtang ang suspetsado nailhan lang sa ngalang Eddie, walay klarong address. Sumala sa kapolisan, ang biktima nagbarog lang sa daplin sa karsada   gawas sa koral sa diskohan, dihang kalit lang miduol ang suspetsado ug walay daghang langas, gipanigbas sa iyang sundang ang biktima.

Nabulit sa mga samad sa ulo, tangkugo, liog ug tuong kamot ang biktima.

Gidala dayon kini sa tambalanan samtang ang suspetsado kinsa giingon nga iyang kontra, gipangita pa sa kapolisan.

 Sa mao gihapong adlaw sa pasko sa kaadlawon duha ka lalaki, diin usa niini American national nalandig sa Barili District Hospital human sila panigbasa sa usa ka wala hiilhing lalaki human sa ilang Christmas party sa maong lugar.

Ang mga biktima mao sila si Rommy Baloyos alyas “Jun-Jun”, 31, taga Sunvil, barangay Poblacion lungsod sa Barili ug Gonsorowski Andrew Dale, 31, usa usab ka American national ug temporaryong nagpuyo sa balay nga gipanag-iya ni Aida Aguilar nga nahimutang sa nahisgutang dapit.

Base sa imbestigasyon sa kapolisan nasuta nga si Baloyos nagkalalis ug si Reynaldo Sibala, 26, taga barangay Poblacion, sa maong lungsod, human sa ilang Christmas party.

Sa mga alas 2:00 sa kadlawon sa nahisgutang adlaw ang duha ka biktima nagdungan og pamauli sa ilang balay dihang giatangan sila sa usa ka wala hiilhing lalaki ug kalit lang gihabas sila niini.

Ang kapolisan sa lungsod nagpahigayon og follow-up nga imbestigayson sa hitabo.

Sa mao gihapong higayon, usa ka 27-anyos nga lalaki ang nalandig sa Danao City District Hospital human kini dunggaba sa usa ka hubog, didto sa sitio Cambiña, barangay Triumpo, lungsod sa Carmen. (Brenda D. Batuto)

Midunggab ni Joavan Fernandez sikop

Ni Brenda Batuto

Usa ka lalaki kinsa giingong badlongon sa ilang lugar ug kanhi midunggab sa sinagop sa mayor sa dakbayan sa Talisay nga si Joavan Fernandez nasikop sa mga polis human kini gireklamo sa iyang mga silingan nga nanigbas niadtong bisperas sa Pasko diha sa barangay Tanke sa maong dakbayan.

Ang suspetsado mao si Randy Bazar, hingkod, nga taga barangay Tanke.

Ang unang hitabo niadtong Disyembre 23, 2010 sa gabii sa barangay Tanke dihang giingong gitigbas ni Bazar sa iyang sundang si Renato Tangag, 60, residente usab sa maong dapit.

Si Tangag nakaangkon og samad tinigbasan sa iyang buko-buko apan giingong dili lawom tungod kay habolan ang gigamit nga sundang ni Bazar busa wala magrabihi ang biktima.

Si PO1 Euwen Pitogo kinsa usa sa miresponde sa hitabo sa pakighinabi niini sa Banat News kagahapon mibutyag nga si Bazar nangabubho kang Tangag kay nagtuo kini nga may relasyon ang iyang asawa ug ang biktima. Matud ni Pitogo nga sa maong hitabo ang mga anak ni Tangag nahadlok na kang Bazar hinungdan nga nangayo kini og panabang sa mga polis.

Nianang pagka- Disyembre 24, 2010 sa alas 10:40 sa buntag ang anak ni Tangag nga si Ronnel mitawag sa mga polis ug mitug-an nga si Bazar mianha sa barangay hall sa Tanke hinungdan nga miresponde dayon ang mga polis.

Matud ni Pitogo nga buot untang makighusay si Bazar tali sa pamilya ni Tangag, apan si Ronnel mihangyo sa mga polis nga adto lang sila husaya sa police station sa barangay Poblacion.  (BANAT NEWS)