Volunteer reporter nagmaoy napusilan

CEBU, Philippines - Kritikal ang kahimtang sa usa ka 14-anyos nga batan-ong lalaki human kini napusilan sa giingong hubog nga iyang silingan nga volunteer reporter sa usa ka estasyonan sa radio ug napusilan usab sa miresponde nga polis didto sa sitio Kenner barangay Poblacion siyudad sa Toledo niadtong Miyerkules sa alas 8:00 sa gabii.

Ang biktima (pangalan gipugngan) molupyo sa nahisgutang lugar kinsa naigo sa dughan samtang nagtan-aw og telebisyon sa ilang balay dihang giingong nagpataka og pabuto og armas ang silingan nga si Ricardo “Rico” Baricuatro, 48, nga volunteer reporter sa usa sa mga estasiyonan sa radyo dinhi sa Sugbo.

Dihang girespondehan sa mga polis naatlan nga padulong na kini og ikyas luwan sa motorsiklo hinungdan nga kini gipusil hangtud nga nadakpan.Naangol sa maong hitabo si PO3 Lorenzo Gutang nagpuyo gihapon sa maong lugar ug nadestino sa Toledo City Police Office human kini gidasmagan sa suspek sa motorsiklo niini sa dayon niining ikyas.

Matud pa ni SPO4 Gil Lastimosa sa Toledo City Police dihang nahinabi sa Banat News subay sa imbestigasyon ang suspek nga si Baricuatro giingong nakainom niadtong tungura.

Ug tungod sa kahubog nagmaoy kini ug nagwara-wara sa iyang armas nga kalibre .38 sa gawas ug nagsinggit-singgit kun si kinsay isog sa mga silingan ug matud pa mimandu sa iyang pag-umangkon nga pagawason sa balay.

Sunod nga nadunggan sa mga molupyo ang tulo ka sunod-sunod nga buto sa armas ug diha nalang nila mahibaw-ing nakaigo si Baricuatro sa 14-anyos sulod sa balay.

Ang kapulisan nga daling napahibawo sa hitabo daling nirespondi pinangulohan ni Gutang uban sa hepe sa tanod nga si Bernardo Layan apan ilahang nasugatan sa may basketbolan ang suspek luwan sa iyang motorsiklo.

Gituohang padulong na moikyas si Baricuatro ug pagkakita sa mga polis gidiretso niini og dasmag ang motorsiklo kanila hinungdan nga nadasmagan si PO3 Gutang ug naigo sa tuhod.

Sumala pang Lastimosa, gikatahong mihana pa og bunot sa iyang armas ang suspek hinungdan nga way nahimo si Gutang kondili ang pagpusil kaniya sa walang paa ug bat-ang.

Nakuha gikan sa suspek ang kalibre .38 nga dunay sulod nga duha ka buhing bala ug laing duha ka kabhang.

Ang mga biktima ug ang suspek pulos gihatud sa Toledo City District Hospital apan gibalhin dayun sa tambalanan dinhi sa dakbayan sa Sugbo.(Uban sa report ni Lesley Caminade)