CEBU, Philippines - Grupo sa mga gipasanginlang mangunguot nga gikan pa sa dakbayan sa Ormoc ang nadakpan dihang nakabiktima og pasaherong lalaki sa PUJ sa barangay Subangdaku dakbayan sa Mandaue alas-12 pasado sa udto kagahapon.
Si SPO1 Emmanuel Enople sa Presinto 2 sa Subangdaku Police Station miila sa mga nadakpan nga mao sila si Edmond Esquera, 38, Joel Pacabes, 40, Joebert Basarte, 41 ug Josecito dela Cruz, 38 nga pulos mga lumad nga taga dakbayan sa Ormoc.
Si SPO1 Enople nga nahinabi sa Banat News miingon nga ang pagdakop sa maong mga suspek natigayon dihang usa ka Jonathan Zapanta, 26, nga taga Mabolo sa dakbayan sa Sugbo ang mireklamong gikuotan sa iyang mahalon nga cellphone atol sa iyang pagsakay og PUJ gikan sa dakbayan sa Sugbo.
Matud pa sa asoy sa biktima nga gikasakay niya ang unom ka mga lalaki gikan sa Colon sa dakbayan sa Sugbu ug sa paghidangat sa barangay Subangdaku namatikdan niya nga gipiit siya sa maong mga lalaki nga gikatupad niya og lingkod ug dihang nanganaug na kini namatikdan sa biktima ang usa sa maong mga lalaki ang nagbitbit na sa iyang cellphone nga gisulod niya sa iyang bulsa.
Tungod niini dali siyang mikanaug ug gigukod ang maong grupo ug dihang naapsan iyang gipangayo ang iyang cellphone apan wala ihatag kaniya ang iyang cellphone ug mihimakak ang unom sa pasangil.
Kini maoy hinungdan nga miadto siya sa police station diha sa unahan ug misumbong, human niini misakay og balik og PUJ ang biktima ug naagian gihapon ang mga suspek diha sa MC Briones sa barangay Guizo hinungdan nga mikanaog siya ug subling nanawag og polis nga miresulta sa pagkasikop sa upat, samtang ang duha nakadagan.
Si Inspector Alexander Nuñez nga maoy officer-in-charge sa Presinto 2 maoy nakatubag sa alarma nga miresulta sa pagkasikop niini.
Narekober gikan sa upat ang lain pang unom ka mahalon nga cellphone nga gituohang iya sa wala pa hiilhing mga biktima. (BANAT NEWS)