Sikyu natagak namatay

CEBU, Philippines - Napalgang patay ang usa ka security guard   kinsa gituohang nahagbong gikan lingkoranan sa guard house sa usa ka residential compound didto sa barangay Pajo, dakbayan sa Lapulapu sa miaging kaadlawon.

Ang namatay mao si Pedro Dawa Pellazo, 33 , nga taga Suba-Basbas sa barangay Marigondon sa maong dakbayan ug guwardiya sa Patalinghug compound sa nahisgotang dapit.

Si PO3 Allan Pantaleon sa homicide section sa kapolisan sa maong dakbayan miingon nga usa ka Marjac Guzila nga nagpuyo sa maong dapit maoy unang nakadiskobre ni Pellozo nga nagbuy-od sa ubos sa hagdan sa guard house.

Matud pa niya nga ang mga sakop sa Emergency Rescue Unit Foundation (ERUF) maoy dali nga mipahigayon unta og first aid kang Pellozo apan nasuta nga nakabsan na kini sa iyang gininhawa.

Dugang pa ni PO3 Pantaleon nga ilang gituohan nga ang namatay mitikang sa tulo ka ang-ang   nga hagdan sa guard house apan nadakin-as kini nga maoy hinungdan sa iyang pagkahagbong.

Midugang si PO3 Pantaleon nga malagmit sa pagkahagbong ni Pellozo napantok ang ulo niini sa sementadong baldosa sa compound kay may dako mang gisi sa iyang ulo nga maoy hinungdan sa kamatayon niini.

Gisuta pa usab sa kapolisan kun wala ba kini bunali og gahing butang nga maoy hinungdan sa pagkagisi sa iyang ulo. Gisugo usab sa kapolisan ang mga tagtungod ni Pellozo nga ipa-autopsy ang patay’ng lawas niini aron masuta kun may foul play ba o wala. (BANATNEWS)