CEBU, Philippines - Ang Arsobispo sa Sugbo Ricardo Cardinal Vidal usa na karon ka adopted son sa dakbayan sa Talisay , human sa gipasar nga resolusyon sa konseho sa siyudad atol sa ilang special session niadtong Lunes.
Ang Resolusyon Numero 2010-SP2-7 nga gipaluyohan ni Bise Mayor Alan Bucao nagkanayon “The City of Talisay has long been a direct and indirect beneficiary and recipient of the impressive, memorable and valuable benefits during the endearing leadership and selfless shepherding of his, in the many service role he played, particularly for whole Island of Cebu benefiting the Cebuanos now and in the future generations”.
Ang konseho sa Talisay nagtimaan sa 29 ka tuig ni Vidal sa iyang pagka-Arsobispo sa Sugbo diin sa maong katuigan daku ang nahimo niyang kausaban sa archdiocese.
Ang nahisgutang kausaban naglangkob sa pagdaghan sa mga parokya, chaplain, religious congregation, community; pag-establisar sa mga shrine, simbahan, kapilya, tunghaan, charity house, Foundation; ang pag-implementar sa programa sa pagbansay-bansay alang sa socio-economic, political, cultural, artistic, historical ug religious concern.
Ang nahisgutang resolusyon nagkanayon usab kini nga si Vidal nakahatag og tabang sa pagpauswag sa kalamboan sa probinsiya sa Sugbo ug sa Cebu Archdiocese ug tungod niini ang probinsiya sa Sugbo nahimong numero unong Archdiocese sa nagkalain-laing aspeto.
Si Vidal kinsa nagpanuigon na og 79 karon nahimong arsobispo sa Sugbo niadtong Agosto 24, 1982 puli kang Cardinal Julio Rosales.
Niadtong nagpanuigon na og 75-anyos si Vidal buot na unta kining moretiro sa katungdanan apan niadtong Oktubre 15, 2010 pa gidawat ni Pope Benedict XVI ang iyang pagretiro.
Si Arsobispo Jose Palma sa Palo, Leyte maoy mopuli sa katungdanan ni Vidal. (BANAT NEWS)