CEBU, Philippines - Nabulit ug naligo na sa kaugalingong dugo ang usa ka dalagang empleyado sa Mactan Export Processing Zone (MEPZ) human kini gipusil sulod sa iyang giabangang lawak sa sitio Sta. Maria sa barangay Pusok dakbayan sa Lapulapu sa milabay’ng hapon.
Ang biktima mao si Rhea Campania Lapas, 19 , lumad sa barangay Perrelos sa Carcar kinsa daling gidala sa tambalanan sa mga kaubanan gumikan sa samad pinusilan diha sa iyang ulo ug sa nawong.
Sa imbestigasyon ni Insp. Juan Capacio, ang hepe sa Homicide Section ug SPO2 Rolito Jumao-as, nasuta nga napalgan ni Rose Ann Lapas igsuon sa biktima nga nagkadugo na kini.
Matud pa sa kapolisan adunay samad sa ulo duol sa aping si Lapas nga gituohang inagian sa bala sa armas ug gidala sa mga sakop sa Emergency Rescue Unit Foundation ngadto sa Cebu Doctors hospital.
Sa gihimong imbestigasyon nagduda ang kapolisan nga posibleng ang uyab niini nga si Aniceto Aloarico nga taga lungsod sa Argao ug kanhi empleyado sa MEPZ may kasayuran sa maong hitabo. – BANAT NEWS