CEBU, Philippines - Mihuboy ang kilay sa usa ka polis sa dakbayan sa Talisay human kini sukmaga sa hubog nga ilang gisikop kagahapon sa kaadlawon didto sa barangay Poblacion sa maong dakbayan.
Ang biktima mao si PO2 Henry Mata sa Talisay City Police Station samtang ang suspetsado nailhan usab sa ngalang Dionsing Panuncia Jr., 18, nga taga barangay Tabunok sa nahisgutang siyudad.
Si Mata nga nahinabi sa Banat News kagahapon mibutyag nga kauban siya nila si PO3 Alfredo Cuizon, PO2 Jundave David ug PO1 Rusty Pelayo sakay sila sa Innova Patrol Car aron motubag sa usa ka trouble alarm sa barangay Linao.
Apan pipila lang ka metros gikan sa police station, mipaka ang likod sa ilang sakyanan nga nakapakurat kanilang tanan.
Dihang ilang gisusi nagaras ang pintal sa sakyanan kay gihapak diay og gahing butang sa suspetsado.
Dihang sikopon na unta si Panuncia dali kining midagan apan nasignit sa mga tanod nga diha sa barangay hall niadtong tungora.
Dihang gisukit ni Mata kun nganong gihapak niya ang sakyanan, wala kini motubag ug kalit hinuong mipalupad sa iyang kinumo ngadto sa nahauna.
Si Mata nga nakalitan ug wala makabantay nasabak sa walang kilay busa mihuboy kini.
Si Panuncia kinsa nagtingkagol karon sa Talisay City detention cell gipasakaan dayon sa kapolisan og kasong disobedience ug malicious mischief. – BANAT NEWS