Usa patay sa rambol

CEBU, Philippines - Patay ang usa ka batan-on human napusilan atol sa nahitabong karambola sa duha ka grupo sa mga batan-on samtang nagsayaw sulod sa diskohan sa sitio Bantayan sa barangay Tungkop lungsod sa Minglanilla niadtong Domingo sa ala 1:30 sa kaadlawon.

Ang biktima mao si Alex Basilan, molupyo ra sa maong lugar samtang wala pa matumbok sa kapulisan kun si kinsa ang mamumuno sa paghimo ning balita.

Matud pa ni PO2 Jade Abrica sa Minglanilla Police station dihang nahinabi sa Banat News subay sa imbestigasyon pulos nanayaw sulod sa diskohan ang grupo sa biktima ug ang grupo sa suspek dihang usa sa mga kaubanan sa duha ka grupo ang nagkabikil hinungdan sa ilang karambola.

Apan dali kining naulang sa mga tanod nga nagbantay apan tunga-tunga sa pagbuwag sa grupo usa sa mga sakop sa pikas pundok ang milanit og armas dayong pusil usa ka higayun sa biktima.

Ang biktima naigo diha sa baba ug nahagba diha sa diskohan hinungdan sa pagkatibulaag sa mga tawo. Gikatahong ang bala mi-ungot sa ubos nga bahin dapit sa dughan sa biktima kinsa gidala sa Minglanilla District Hospital apan wala na kini makaabot nga buhi sa maong tambalanan.

Gituohan nga may kalambigitan sa magkaribal nga fraternities nga gi-apilan sa duha ka grupo sa mga batan-on ang hinungdan sa nahitabong kagubot nga padayun pa karung gi-imbestigar sa kapulisan. (Uban ni Rey Pasaporte) (BANATNEWS)