CEBU, Philippines - Nangandam nang daan ang Commission on Elections sa posibilidad nga dunay mahitabong halapad nga brownouts sa umaabot piniliay sa Sangguniang Kabataan ug Barangay elections karong Oktubre 25.
Si Comelec-7 acting regional Veronico Petalcorin sa pakighinabi sa Banat News nagkanayon nga mipasalig kanila ang power producers ug distributors sama sa Visayan Electric Cooperative nga malikayang adunay mahitabong brownout sa maong adlaw.
Apan si Petalcorin nagduha-duha bisan paman sa maong pasalig sanglit gipahibalo siya sa Department of Energy nga kulang gyud ang reserbang kuryente ang Kabisay-an sa pagkakaron.
“Malipayon kita nga we are assured by power producers nga paninguhaon nila (walay brownout), pero wala kita makasiguro nga dili gyud kini mahitabo,” matud pang Petalcorin.
Ang Oktubre 25 gideklarar ni Presidente Benigno “Noynoy” Aquino III nga non-working holiday kini aron mahatagan og kahigayonan ang tanan nga makabotar.
Nunot sa maong deklarasyon masaligon ang power providers nga menus ang kaon sa kuryente sa mga pabrika, planta, mga tindahan ug uban pa nga migamit og kuryente.
Apan si Petalcorin nagkanayon nga aron makasiguro nga dili mabalda ang piniliay sa barangay giawhag niya ang mga maestra, poll watchers ug uban pang personahe nga adunay papel sa eleksyon sa pagdala sa gikinahanglang gamit.
Kini sama sa flashlights, baterya, kandila ug uban pa kun ugaling may mopalyar pa gyud nga power provider.
Ning nanglabay’ng mga adlaw duha ngadto sa tulo ka oras ang gipatumang rotation brownout sa Veco gumikan sa pagkulang sa nagsuplay og kuryente sa ilang franchise area.
Giawhag usab niya ang publiko nga nianang adlawa menusan ang paggamit sa ilang mga electrical appliances aron mamenusan ang kakulangon sa kuryente ug malikayan ang pagpahigayon og ‘rotation brownout.’ – BANAT NEWS