2 Naluwas sa plane crash

CEBU, Philippines - Nasalbar gikan sa tinong kamatayon ang usa ka piloto ug ang iyang student pilot sa nahagsa nilang abyon diha sa Lake Danao sa barangay Campo sa lungsod sa San Francisco, Camotes kagahapon sa buntag.

Si Insp. Socrates Medillo, hepe sa San Francisco Police Station sa pakighinabi sa Banat News miila sa mga naluwas mao si Capt. John Almiro ug ang student pilot nga Yemeni national nga si Alaa Medi.

Matud pang Medillo bukol lang sa ulo ang naangkon ni Medi samtang walay tatsa o kadaot nga naangkon si Almiro atol sa maong aksidente.

Ang maong abyon nga usa ka single-engine Cessna nga may rehistrong RP-C4421 gikan pa sa dakbayan sa Ormoc ug padulong nang mopauli sa Mactan Cebu International Airport sa dakbayan sa Lapulapu.

Kini gipanag-iya ni Capt. Jessup Bahinting sa Aviatours nga nag-operate og flying school ug flight tours diha sa dakbayan sa Lapulapu.

Sumala pa ni Medillo base sa pamahayag sa nakahinabi niyang aircraft mechanic nga si Isagani Loon giingong samtang naglupad ang abyon gibana-banang 2,500 ka tiil ang gitas-on kalit nga napawong ang makina niini.

Tungod kay layo paman ang gihimong gamay’ng tugpahanan sa San Francisco naninguha nalang si Almiro nga ‘i-glide’ ang abyon gamit ang pako niini ug ang pagkontrol sa aelerons ug flaps.

Hangtud nga ilang nasigpatan ang Lake Danao ug inanay nga mipaubos didto aron kini ipasadsad apan sumala pang Medillo nasangit ang landing gear (ligid) sa abyon sa mga ‘soli-soli’ nga tanom ug namumo ang abyon sa kalapokan.

Matud pang Medillo swerteng wala mosiga o momugna og kalayo ang pagka-crash niini ug luwas nga nakagawas ang duha gikan sa abyon. Matud pang Medillo taga hawak ang lapok ug tubig sa maong dapit.

Gihulagway ni Medillo nga kapin 500 ka metros pa ang gilay-on gikan sa labing duol nga dalan ang crash site. Dihang naabot silang mga polis sa maong lugar nakatugpa na ang usa ka sibilyan nga helicopter diha sa crash site nga giluwanan ni Loon.

Aron pagsiguro sa ilang kahimtang gidala sa maong helicopter sa San Francisco District Hospital ug kagahapon nakabalik na sa Mactan Cebu ug luwas na ang kahimtang.

Si Ken Madrid, ang executive vice president sa Aviatours sa pakighinabi sa Banat News kagahapon mibutyag nga ang maayong training sa ilang mga piloto maoy nakaluwas kanila.

Sumala pa ni Madrid nga normal nga emergency landing ang nahitabo ug ang pagkasukamod sa abyon diha sa kalapukan dili tungod kay nasangit sa mga tanom kundili nalubong ang pangunahang ligid niini ug tungod sa gikusgon natumba kini.

Matud pang Madrid ang abyon gikan pa gyud sa MCIAA kagahapon ug mipahigayon og routine flight lesson ug pag-abot sa Ormoc City airport nag-“touch-and go maneuver” kini ug mibalik padulong sa Sugbu ug gitakda untang motugpa sa Camotes airstrip.

“Pagdating nila sa Camotes nagkaroon sila ng engine problem kaya naghanap sila nang mapag-lalandingan…normal naman ang lahat,” matud pang Madrid.

Dugang pa ni Madrid nga ang 35 ka abyon sa ilang kompanya pulos gimentinar og maayo sa ilang mga mekaniko ug gi-check kini kanunay sa mga student pilot, dayon sa instructor pilot ug sa pre-flight checks una pa ang pagbiya sa airport.

Gipaabot nga adunay himuong imbestigasyon ang Civil Aviation Authority of the Philippines sa maong aksidente. (BANATNEWS)