CEBU, Philippines - Usa ka patrol car sa Mobile Patrol Group nga mitubag og alarma kagahapon sa kaadlawon ang naugdaw human kalit nga miulbo ang kalayo gikan sa makina niini.
Luwas hinuon ang duha ka polis nga sila si PO2 Remus Goco ug PO2 Joel Leyson kinsa maoy sakay sa Innova patrol car 014 niadtong tungura sanglit naatol nga mikanaog sila aron pag-adto sa dapit diin mahitabo ang gialarmang domestic violence.
Sumala pang SPO4 Edmund Mola, ang imbestigador sa MPG sa pakighinabi sa Banat News nga padulong na unta ang maong mga polis diha sa sudlunong bahin sa barangay Lorega sa may Doña Pepang Cemetery dihang nahitabo ang sunog.
Si PO2 Goco sa report kagahapon sa buntag sa ABS-CBN Central Visayas Maayong Buntag Kapamilya, kini mibutyag nga namatikdan nilang may migawas nga aso gikan sa manobela.
Ug dihang ilang gihunong ang sakyanan ug nanganaog nakit-an nilang adunay nigawas nga aso diha sa hood maong ilaha kining giablihan ug diha-diha miulbo na ang kalayo.
Dali hinuong nakaresponde ang mga sakop sa Bureau of Fire Protection sa siyudad ug napawong kini sulod sa pipila ka minutos.
Si SFO3 Antonio Gonzales sa susamang report nagkanayon nga posibleng electrical short circuit ang nahitabo sa sakyanan ug ang baterya maoy nakaingon sa maong sunog.
Wala hinuoy naangol sa maong insidente. Samtang sayo pa niana sa mao gihapong report, giingong aduna pay laing patrol car ang nawagtangan og break nga mao ang patrol car number 015, giingong nahutdan kini og break fluid. (BANATNEWS)