Ngalan sa high school gi-usab

CEBU, Philippines - Hingpit nang usbon ang pangalan sa pampublikong tunghaan sa high school diha sa barangay Mabolo nga mao ang Florencio Urot Memorial National High School base sa ordinansang nakab-ot sa mga sakop sa konseho sa dakbayan.

Una pa niini, si Konsehal Eleuterio Wenceslao misang-at og resolusyon kabahin sa maong lakang apan matud pa niini angayang hatagan usab og kredito si kanhi konsehal Nestor Archival nga maoy orihinal nga mipasaka sa maong ordinansa.

Ang maong tunghaan paganganlan na karon og Mabolo National High School. Kini natukod niadto pang 1985.

Ang konseho sa Mabolo mipadangat og resolusyon ngadto sa dakbayan nga nagpasabot nga sukwahi sa nahibaw-an sa kadaghanan, ang gikahimutangan sa maong tunghaan diha sa North Reclamation Area dili donasyon gikan sa pamilyang Urot kondili kabahin kini sa gi-reclaim nga lugar.

Atol sa gihimong session sa konseho niadtong milabay’ng Biyernes alang sa katapusang pagtuki sa maong resolusyon, walay konsehal nga mipadayag og pagsupak sa resolusyong gisang-at ni Wenceslao hinungdan nga dali ra kining napasar.

Sumala pa sa barangay kapitan sa Mabolo nga si Reynaldo Ompoc, ang kanhi konsehal ug mayor nga si Urot dili residente sa maong barangay kundili diha sa barangay Carreta.

Dugang pa niini, sukad pa sa katukoran sa maong tunghaan wala kaayo kini makapaagni o nakapasuod sa mga residente sa Mabolo tungod kay dili kaayo pamilyar kanila ang maong pangalan.

Si Archival sa iyang bahin miklaro sa iyang resolusyon kaniadto nga wala magpasabot nga ang pag-ilis sa pangalan sa maong tunghaan usa ka lakang nga gikalimtan na ang dungog sa maong kanhi opisyal.

Sumala pa niini isip paghatag og dungog kang Urot gipangalanan ang usa sa mga dalan diha sa North Reclamation Area sa iyaha.

Si Urot usa ka kanhi konsehal sa dakbayan sa Sugbu niadtong 1941 hangtud 1971 ug isip first councilor nakalingkod kini isip mayor sulod sa 108 ka adlaw human ang kasamtangang mayor ug bise mayor niadtong panahona nga sila si Mayor Eulogio Borres ug ang bise mayor niini milansar sa mas taas nga posisyon. (BANAT NEWS)