Jailguard sa CPDRC naimbestigar na

CEBU, Philippines -  Ang chairman sa Committee on Discipline and Investigation (CODI) sa Kapitolyo nga si Atty. Lito Astillero mipahibawo nga nahuman na siya og imbestigar sa mga jailguard ug mga piniriso sa Cebu Provincial Detention and Rehabilitation Center (CPDRC) kalabot sa pagpangulata sa sulod sa prisohan nga nakapatay sa usa ka binilanggo, samtang na-hospital ang laing usa.

Matud pa ni Astillero nga dili pa siya makahatag sa kompleto niyang finding ngadto sa buhatan ni Gobernador Gwen Garcia.

Apan iyang gitumbok nga gisentro karon sa iyang padayon nga imbestigasyon mao ang narelibohang jail warden nga si Alito Gabuya sanglit misulay man kini sa pagtabon sa nahitabong pagpangulata sa sulod sa maong bilanggoan.

Si Astelliro nagkanayon nga nakita sa ilang pasiunang pakisusi nga namakak si Gabuya sa paghatag og kasayoran didto sa buhatan sa gobernadora human niya isulti nga ang namatay nga piniriso natagak sa bangkong gitungtungan sa panghayhay sa iyang mga linabhan.

Matud pa ni Astelliro nga ang nahisgutang warden wala gyud mopahigayon og kaugalingong imbestigasyon kay igo lamang kining mituo sa gisulti sa mga piniriso nga kauban ni Angelito Cabalquinto, ang namatay ug sa na-hospital nga si Benjie Undit.

Si Astelliro miingon nga ilang susihon kun wala bay liabilities o tulubagon si Gabuya nga sarang kapahamtangan og tukmang silot sa buhatan sa gobernadora.

Dugang pa ni Astelliro nga human sa ilang imbestigasyon kang Gabuya anha na siya mopagawas og rekomendasyon ngadto sa buhatan sa gobernadora sa dili pa niya sugdan ang imbestigasyon sa lima ka mga kawani ni Vice Gov. Gregorio Sanchez nga namatud-ang wala sa ilang gitrabahoan nga buhatan dihang gipahigayon sa Provincial Human Resource Office ,ang random audit sa mga kawani sa bise gobernador niadtong nakalabay nga semana.  – BANAT NEWS