CEBU, Philippines - Ang mag-uuma kinsa sa sayo pa gikatahong namatay nga nagtindog gihapon ang kinatawo , wala mamatay gumikan sa Viagra kundili gumikan sa pinaakan sa bitin nga kobra.
Si Jerry Villafuerte , suod nga higala ug silingan ni Prudencio Onding Catalan , 45, nga taga barangay Alambijud, lungsod sa Argao, nagkanayon nga ang namatyan ni Catalan mao ang pinaakan sa kobra.
Matud pa ni Villafuerte nga si Catalan daghan og binuhi nga halas sa ilang balay.
Si Catalan nakit-an sa iyang pamilya nga nagbuy-od sa ilang katre sa lawak niini nga nagbuwa ang baba ug wala nay pulso.
Gani ang silingan sa biktima nagduda nga buhi pang gilubong sa iyang pamilya si Catalan kay matud pa ang mapaakan og halas mawad-an og pulso apan may kinabuhi pa ug wala kini ipahiling og doktor una ilubong.
Si Catalan maoy giingon sa kapolisan sa Argao nga nagtindog lang gihapon ang kinatawo bisan patay na busa ilang gisuspetsahan nga namatay kini gumikan sa Viagra. (BANATNEWS)