CEBU, Philippines - Gibasol sa usa ka opisyal sa kapolisan nga apil sa napalpak nga hostage- rescue sa nahitabong hostage- taking niadtong Agosto 23 ang mga ‘samokan’ kon ‘interference’ atol sa ilang negosasyon sumala pa sa report sa ABS-CBN News.com.
Si Chief Insp. Romeo Salvador kinsa usa sa gipatawag sa Incident Investigation and Review Committee kagahapon (Sabado) nagtuong kung wala lay mga samokan malinawon sigurong mitahan ang suspek nga si kanhi Sr. Insp. Rolando Mendoza.
Walo ka turistang taga Hong Kong ug si Mendoza ang nakalas sa maong hitabo.
“May nakialam po kasi e…kung yung cellphone ay continuous naming nagagamit, tuloy-tuloy sana negotiations,” matud pa ni Salvador sa maong report.
Si Salvador maoy assistant ni Superintendent Orlando Yebra nga maoy negosyador sa maong insidente.
Matud pa ni Salvador nga adunay duha ka cellphone si Mendoza nga maoy ilang gigamit isip contact.
Sumala pa niya atol sa kritikal nga takna nga ilaha na unta kining tawgan sa cellphone aron ipahibalo nga mitugot na ang kadagkoan sa PNP nga ibalik siya sa pagkapolis ug i-review ang iyang kaso sa Ombudsman dili na makontak ang mga cellphones niini.
Nianang tungura usab nakit-an niya sa telebisyon ang pagdakop sa iyang igsuong polis nga si SPO2 Gregorio Mendoza hinungdan sa kasuko niini ug nagsugod dayon ang butobuto sa armas sulod sa bus.
Nasuta nga giingong adunay radio station nga nag-interbyu kang Mendoza on-air niadtong mga tungura.
Si Presidente Benigno Simeon Aquino III una nang miako sa responsibilidad sa maong kapalpakan nga gisaway og maayo sa Tsina ug Hong Kong. (BANATNEWS)