Gipusil sa 4 ka tulisan

CEBU, Philippines - Usa ka negosyante nga giingong distributor og produktong mga softdrinks sa lungsod sa Minglanilla gipusil sa usa sa upat ka mga tulisan nga nagsakay og motorsiklo sa miaging hapon sa St. Peter’s Village, barangay Tunghaan, sa maong lungsod.

Naigo sa bala sa wala mahibaw-ing kalibre sa armas ang abaga ni Virgilio Bellon, 45, residente duol sa nahitaboan.

Sa pakighinabi sa Banat News ni PO2 Jade Abrica sa Minglanilla Police Station mibutyag nga si Bellon nagmaneho sa iyang kotse nga Toyota Surf nga may plakang YBP-195 uban sa iyang anak ug higalang si Antonio Cabuana paingon sa ilang balay sa St. Peter’s Village.

Sa dihang naabot ang kotse duol sa ilang panimalay, kalit lang mibutho ang duha ka motorsiklo nga adunay sakay nga tagduha ka lalaki ug mibabag sa ilang sakyanan.

Mikalit usab og pahunong sa kotse si Bellon ug sa walay igong hinungdan gipusil kini ug maayong pagkaigo sa iyang walang abaga.

Human gipusil si Bellon, gialirongan ang kotse niini ug giablihan ang mga pultahan niini ug didto mideklarar og hold-up ang upat ka lalaki. Gani, gisusi pa ang sulod sa kotse ni Bellon ug gitan-aw ug aduna ba silay matiti nga mga butang.

Apan napakyas ang mga kawatan tungod kay wala silay nakuha ug nagdali-dali na usab sila pagsibat sa dihang nakabantay nga aduna nay kapolisan nga nagpaingon sa maong lugar.

Human misibat ang mga tulisan, dali usab nga gidala sa South General Hospital si Bellon aron matambalan.

Maayo na lang gani kay wala paulani og bala ang biktima sa dihang walay nadala ang mga tulisan ug wala usab hilabti ang iyang mga kuyog.

Matud pa ni Abrica padayon pa karon ang imbestigasyon pagtumbok kun si kinsa ang mga tulisan nga misuway unta sa pagpanulis sa biktima. – BANAT NEWS