CEBU, Philippines - Trese ang na-angol apil na ang drayber sa mga tinun-an sa Don Bosco Technological School dinhi sa dakbayan sa Sugbo human mag-overheat ug mibuto ang radiator sa bus nga ilang gisakyan ug nalapwahan sa init nga tubig ang mga sakay niining mga tinun-an nga padulong unta sa usa ka retreat seminar sa barangay Mantalungon sa Dalaguete.
Ang aksidente nahitabo kagahapon sa buntag diha sa liko-on nga bahin sa Zigzag Road sa bukirang bahin sa barangay Obo sa lungsod sa Dalaguete kagahapon sa alas 10:20 sa buntag.
Ang drayber sa NB-Boy minibus nga naangol human mapaso sa nag-overheat nga sakyanan mao si Reynaldo Quivedo, 32, taga Poblacion, Dalaguete. Ang operator sa maong bus mao si Buenaventura Ilumino, taga Mantalongon, Dalaguete.
Sa pakighinabi sa Banat News kang Insp. Bonifacio Lucerna mibutyag kini nga nagtangas ang maong minibus nga may dalang 38 ka mga tinun-an sa vocational department sa maong tunghaan padulong unta sa Mantalongon Retreat House apan kalit nga mi-overheat ug misunod ang pag-aso sa sakyanan dayon ang pagbuto sa radiator ug pagkapawong sa makina.
Kini maoy hinungdan nga miatras og maayo sa minibus padulong sa bung-aw nga gibana-banang 500 metros ang gilawmon apan swerteng pag-abot sa pidpid sa dalan nasangit kini sa usa ka dakong kahoy ug napugngan ang pagkahagbong niini.
Samtang nagpadulong pag-atras ang minibus nag-iyahay og panglayat sa bintana ang mga tinun-an nga nakaingon sa pagkaangol sa mga tinun-an lakip na niini ang onse ka mga nalapwahan sa init nga tubig sa mibuto nga radiator.
Daling gihatud sa Julio Rosales Memorial Hospital ang mga naangol nga tinun-an nga naglakip sa onse ka hamtong ug duha ka minor gumikan sa naangkon nga mga bun-og, pangos ug paso apil na ang drayber nga napaso ang kalawasan human nag overheat ang sakyanan sanglit diha ra kini maglingkod duol sa radiator.
Samtang sa pakighinabi usab sa Banat News ni Cleofe Cabrera usa ka staff sa Don Bosco College mibutyag nga ang kwarenta ka estudyante mao ang first batch alang unta sa retreat diha sa Mantalungon. - Darrel Carumba (BANAT NEWS)