Upat naigo sa kilat

CEBU, Philippines - Upat ka mga tawo ang nalandig sa tambalanan human maigo sa kilat atol nga pagbundak sa kusog nga uwan kagahapon sa buntag diha sa duha ka barangay sa Mancilang ug Tugas sa lungsod sa Madredijos isla sa Bantayan.

Apan ang maong insidente wala mapahibalo sa mga kabanay ngadto sa kapolisan apan si Konsehal Emie Mates Gabito maoy mipahibawo sa Banat News kabahin sa hitabo.

Nakumpirmar sa Banat News sa Bantayan District Hospital nga dunay upat nga gidala sa ilaha nga nangaigo og kilat. Si Malonie Nacorda, nurse on duty sa maong tambalanan nga nahinabi sa Banat News miila sa mga nakilatan mao sila si Charice Grace Sena 17, taga Mancilang.

Samtang laing naigo mao ang magsuong Opril nga sila si Rodena, 20, Rodem, 15, ug ilang inahan nga si Editha, 42, pulos taga barangay Tugas.

Matud ni Nacorda nga nahitabo kini alas-8 kagahapon sa buntag apan usa ka oras pa una madala kanila ang mga biktima tungod sa kakusog sa uwan nga giubanan og kilat.

Si Sena giingong paingon mag-charge sa iyang cellphone ug sa dihang iyaha nang isaksak sa outlet ang charger kalit lang gidakop ang kuryente sa kilat ug nakuryentihan kini.

Samtang ang mga Opril, matud ni Nacorda naglingkod sa hagdanan sa balay dihang kalit nga mipaka ang pultahan sa balay ug mao nalay ilang nabatyagan nga katunga sa ilang lawas daw sama sa nakuryentihan ug labihan ang kainit sa ilang lawas.

Si Rodem nagisi ang gisul-ob nga t-shirt ug nakaangkon og paso sa dughan samtang ang inahan matud ni Nacorda nagpunay pa og suka atol sa pagsulat ning balita kagahapon na sa hapon.

 Dugang pang Nacorda nga tag-as kaayo og hilanat ang inahan ug anak samtang si Sena taas usab kaayo og temperature.

Si Alice Quijano Canaza, weather forecaster sa Pag-Asa Mactan nga nahinabi sa Banat News nagtuong dunay metal ang pultahan sa balay nga maoy gidakop sa kilat. Ang cellphone mas delikado kaayo sa higayong dunay kilat.

Matud ni Canaza nga nasinati karon ang Inter-Tropical Convergence Zone (ITCZ) dinhi sa Kabisay-an ug Mindanao ingon man didto sa tunga-tungang bahin sa Southern Luzon hinungdan nga padayong nakasinati sa pag uwan-uwan inabagan sa pagpanugdog ug kilat sa mosunod nga mga adlaw.  – BANAT NEWS