Miulang sa rambol: Factory worker napusilan sa bugan
CEBU, Philippines - Hastang demalasa sa usa ka factory worker nga igo lang miuwang sa away sa pundok sa mga batan-on mao na hinuon ang napusilan sa bugan ug iyang kinatawo sa barangay Guinsay siyudad sa Danao kagahapon sa ala 1:30 sa sayong kaadlawon.
Ang biktima (ngan gipugngan) molupyo ra sa maong lugar giingong naigo sa iyang itlog ug kinatawo human pusila sa usa sa mga batan-ong iyang giulang sa panag-away.
Matud pa ni SPO4 Edgar Gomez sa Danao City Police Station dihang nahinabi sa Banat News subay sa ilang imbestigasyon ang biktima dili palang kaayo dugay nga miabot gikan sa trabaho ug nakahukom nga manihapon sa usa ka tindahan dili layo sa ilang balay.
Apan samtang siya nagkaon adunay nahitabong komosyon tali sa mga batan-on diha sa kan-anan hinungdan nga mitindog kini ug nanginlabot ug gipahunong sa ilang away.
Wala makabantay ang biktima sa usa sa mga nag-away nga mikuha og armas masuk-anong mikomprontase sa biktima dayon kalit nga mipusil sa bugan niini.
Ang biktima naigo sa iyang tuong bahin sa paa ug milapos ang bala sa iyang bugan ug naigo ang itlog ug ang kinatawo niini.
Daling gitabang ang biktima ug gihatud sa Danao City District Hospital apan tungod sa seryosong kadaut nga naangkon sa kinatawo niini dali kining gibalhin sa tambalanan dinhi sa dakbayan sa Sugbo alang sa dugang medikasyon ug operasyon.
Samtang ang kapulisan padayun pa sa ilang imbestigasyon pagtumbok sa suspek. (BANAT NEWS)
- Latest
- Trending