Ubang bus sa Corominas apilon inspeksyon
CEBU, Philippines - Apilon sa Land Transportation and Franchising Regulatory Board (LTFRB-7) ang ubang mga sakyanan sa Corominas Brothers Bus Lines pagpaubos sa road worthiness test bisan pa og ang V&JA Bus Lines nga gipanag-iya ni Dulce Gantuangco nga mikabit sa linya sa Corominas mao ray nakasugat og disgrasya sa DAS Landing Toledo nga may 15 patay ug laing 65 ang nangaangol.
Gipasabot ni LTFRB-7 director Benjamen Go nga tuyo niini nga masigurong luwas ang tanang bus pasahero-an ubos sa prangkisa sa Corominas aron malikayan nga dili na masubli pa ang mga sunod-sunod nga disgrasya sa kadalanan.
Giklaro hinuon ni Go nga dili suspensuhon ang operasyon sa ubang mga sakyanan sa Corominas ug tugutan kining makapadayon sa biyahi samtang ipaubos sa road worthiness test.
Karung adlawa gikatakdang padad-an og notisya sa LTFRB-7 ang ubang mga operators ubos sa Corominas Bus Lines nga giingong mga kabanay ra usab sa maong pamilya.
Sugod niadtong miaging adlaw gipatuman na sa LTFRB ang 30 ka adlaw nga suspension order sa unom ka bus pasahero-an ubos sa V&JA Bus Lines nga gipanag-iya ni Gantuangco nga mikabit sa linya sa Corominas.
Usa sa mga bus sa V&JA maoy nakasugat og disgrasya niadtong Sabado sa hapon. – BANAT NEWS
- Latest
- Trending