Sanchez mo-review sa mga kontrata

CEBU, Philippines - Mibahad si Vice Governor Gregorio Sanchez nga siksikon ug reviewhon na niya pag-ayo karon ang mga kontrata sa Kapitolyo nga giintrahan ni Gobernador Gwendolyn Garcia.

Kini sa tinguha nga dili na makapalit og usab ang kagamhanan sa lalawigan og yuta nga naa sa ilawom sa dagat nga gigastohan sama sa napalit didto sa dakbayan sa Naga nga gibayran og himabaw sa usa ka gatos ka milyon ka pesos sa kagamhanan sa lalawigan.

Matud pa ni Sanchez sa interview sa DyRF nga mao kini karon ang iyang bag-ong mandato isip fiscalizer sa executive department sa kagamhanan sa lalawigan kay gibati na og kalugda ang mga Sugboanon dihang mismo ang gobernador maoy utok sa pagpamalit sa yuta nga dili angayang paliton sa kagamhanan sa dakong kantidad.

Matud pa ni Sanchez nga ning iyang ikatulo ug katapusang termino, iya gyung bantayan ang mga lihok sa gobernador aron nga dili madiskarel ang kuwarta nga buhis sa mga Sugboanon nga ikagasto sa mga butang nga dili angayang gastohan niini.

Lab-as pa sa panumdoman ni Sanchez ang lote nga gibayran sa kagamhanan sa lalawigan og P98 milyones nga nahimutang sa barangay Tinaan, dakbayan sa Naga nga nalubong sa tubig ug kabakhawan.

Si Sanchez nagkanayon nga bisan kun duha ra sila si Provincial Board Member Arleigh Sitoy sa 6th district, ang oposisyon sa hunta probinsiyal, apan iyang gisaad nga mangita siya og paagi nga ma-review ang tanang mga kontrata sa mga proyekto nga gisudlan ni Garcia.

Miangkon ang bise gobernador nga naglisod gyud siya sa pagkuha og mga dokumento sa tanang mga kontrata sa Kapitolyo kay dili man siya hatagan sa iyang gi-request ug gitipigan gyud kini pag-ayo. Iyang gihulagway nga ang pamaagi nga gipatuman karon sa gobernadora walay "transparency" ug lubog kaayo kay dili kini gustong masayran ang iyang mga sekreto.

 Dugang pa ni Sanchez nga gawas sa pagpa-review sa tanang mga kontrata, buot usab niyang masayran kun pila na ang kinatibuk-ang kita sa P5 nga koleksyon isip entrance fee sa matag tawo nga mosulod sa Cebu South Bus Terminal ug sa parking fee sa Capitol compound.  – BANAT NEWS