Misukol sa tulisan napusilan

CEBU, Philippines - Kritikal ang kahimtang sa usa ka supervisor kinsa misukol busa gipusil sa duha ka wala hiilhing mga lalaki nga mitulis kaniya didto sa barangay Luray II, siyudad sa Toledo kagahapon sa alas 12:40 sa sayong kaadlawon.

Ang biktima mao si Elmer Alboro Bendanillo, 45, minyo, nga taga Rafols Street, Poblacion, dakbayan sa Toledo ug supervisor sa Atlas Fertilizer Corporation nga nahimutang sa barangay Sangi, sa maong dakbayan.

Si SPO4 Gil Lastimosa sa Toledo City Police Station mibutyag sa Banat News nga ang biktima gikan pa sa iyang trabaho ug naglakaw kini paingon sa ilang balay.

Apan pag-abot niini sa nahisgutang lugar nakamatikod siyang may mga tawong nagsunod kaniya unya miduol kini kaniya uban sa pagtion sa ilang armas de fuego ug mipahibawong tulis dungan ang pagpangayo sa iyang pitaka ug kuwarta.

Apan misuway siya sa pagsukol sa mga tulisan hinungdan nga gitabangan siya og pusil sa duha ka tulisan ug nasabak ang sentro nga bahin sa iyang lawas ug tuong bukton.

Human siya matumba sa yuta, gibiyaan siya sa mga tulisan kinsa dali nga misibat pahilayo sa maong lugar.

Ang biktima daling gihatod ngadto sa Toledo City District Hospital apan gibalhin kini sa tambalanan sa dakbayan sa Sugbo gumikan sa talandugon niyang kahimtang.

Ang kapolisan padayon pa sa ilang imbistigasyon pagtumbok sa mga responsabli sa krimen. –  BANAT NEWS