P.Noy nanumpa kagahapon

CEBU, Philippines - Nanumpa na kagahapon sa udto ang ika-15 nga presidente sa nasud nga si Presidente Benigno Aquino III atubangan sa naglawod-lawod nga pundok sa katawhan didto sa makasaysayanon kaayong Quirino Grandstand sa Manila sa untop alas 12:00 ang takna.

Sumala sa GMA News, si Aquino nanumpa atubangan ni Supreme Court Associate Justice Conchita Carpio- Morales, kinsa mao usab ang mipapanumpa ni Bise Presidente Jejomar Binay sa sayo pa.

Sa wala pa siya moadto sa Quirino Grandstand, ang bag-ong Pamuno nasud maoy mi-courtesy call sa taligawas na nga si Presidente Gloria Arroyo   gikan sa Malacañang ug nagkuyog sila og sakay sa usa ka pribadong awto ngadto sa Luneta diin nanumpa ang naulahi isip bag-ong kongresista sa ikaduhang distrito sa Pampanga.

Ang labing ulahing higayon nga nasaksihan sa Pilipinas nga malinawong pagtakli sa gahum tali sa duha ka administrasyon mao ang gihimo niadtong l988 dihang si kanhi Presidente Joseph Estrada maoy napiling presidente sa nasud nga Pilipinhon.

Apan napapha siya niadtong tuig 200l gumikan sa mga kasong may labot sa korapsyon busa gihulipan siya sa iyang kanhi bise presidente nga si Arroyo.

Mikandidato pagbalik si Estrada sa pagka-presidente niadtong Mayo 10 nga eleksyon apan napildi siya ni Aquino

Si Estrada ug ang gipulihan niyang si kanhi Presidente Fidel Ramos maoy pipila sa mga dignitaryong mitambong sa inugurasyon ni Aquino uban sa mga langyaw’ng diplomata ug mga umaabot nga opisyal sa kagamhanan.

Si Aquino nagsilbi isip senador sukad pa niadtong 2007 sa wala pa siya mokandidato sa pagka-presidente human sa kamatayon sa iyang inahan nga si kanhi Presidente Corazon Aquino. Sa iyang pagpamulong gipasabot niya nga ang katawhan maoy nagbutang kaniya sa usa ka dakong responsibilidad nga dili na niya kabalibaran.

Ang iya lang gihangyo nga tungod sa kadako sa iyang obligasyon kinahanglang suportahan siya sa mga Pilipino aron   molampos siya sa iyang misyon sa pagpatuman sa mga dagkong kausaban ug pagbag-o sa nasud nga Pilipinas. –  BANAT NEWS