CEBU, Philippines - Patay ang usa ka barangay tanod human kini dunggaba sa kauban niining barangay tanod dihang nagkabikil kini atol sa ilang pagbantay sa gipahigayon nga disko sa miaging gabii sa barangay Cogon, lungsod sa Cordova sa milabay’ng gabii.
Ang namatay mao si Roberto Fernandez, 56, ug ang nakadunggab mao si Francisco Abano, 59, managkaubang barangay tanod sa nahisgutang barangay.
Si PO1 Ryan Casiban sa Cordova Police Station miingon nga ang duha maoy gitahasan sa pagpatuman sa kahapsay ug kalinaw sa gipahigayong disko apan nagkalalis gumikan sa pagpasulod og mga tawong ilang kaila nga walay bayad-bayad.
Taliwala sa mainiton nilang panaglalis nadunggaban sa suspek ang dughan sa biktima ug daling miikyas. Si Fernandez gidala sa Mactan Doctors Hospital apan gideklarar nga dead on arrival.
Ang suspek mitahan pipila ka oras diha sa kapolisan ug gikatakdang pasakaan og tukmang kaso karong adlawa. - BANAT NEWS