'Pag-Interbiner' ni Soc susihon sa ombudsman

CEBU, Philippines - Manginlabot na ang Ombudsman for the Visayas may labot niining giingong pagpanghilabot ni Talisay City Mayor Socrates Fernandez sa operasyon sa kapulisan dihang gidakop ang sinagop niining si Joavan niadtong milabay’ng semana.

Si Joavan gireklamo og pagpanion og armas sa usa ka registered nurse nga si Vincent Castrodes diha sa Bulacao siyudad sa Talisay niadtong milabay’ng Biyernes.

Si Assistant Ombudsman Visayas director Virginia Palanca Santiago mipadayag nga ipa-docket niya alang sa pagpahigayon og fact finding investigation ang mga report sa pamantalaan nga nagtumbok nga namugos og abli ang mayor sa sakyanan.

Si Fernandez sumala pa sa duha ka polis nga nagbantay sa sakyanan diha sa shop giingong namugos og abli sa sakyanan ug miinsister nga iyaha kini ug mikuha sa bag nga pula sa sulod sa maong Isuzu Bighorn.

Ang kapolisan niadtong tungura mikostudiya sa gisakyan tungod sa pasangil ni Castrodes nga gitionan siya sa anak sa mayor og pistola dihang diriyot silang magbangga diha sa Bulacao.

Nagpaabot ang kapolisan og search warrant aron ablihan ang sakyanan apan Sabado na sa gabii gyud kini natigayon hinuon dunay nakuhang kalibre .45 ug mga bala ang mga searchers human makakuha og warrant.

Apil sa susihon sa ombudsman ang report nga gipanag-iya sa kagamhanan sa Talisay ang Isuzu Bighorn nga gipagamit sa mayor kang Joavan.

Sumala pa ni Santiago nagpadayon ang Ombudsman sa Oplan Red Plate batok niadtong mga sakyanan sa gobiyerno nga gigamit sa mga kawani niini sa ilang personal nga katuyoan.

Nanghinaot si Santiago nga diha sa ilang buhatan masang-at ang kaso tungod kay gipasalig niyang magpadayon gyud kini ug walay areglo nga mahitabo sukwahi sa mga nilabay’ng kontrobersya ni Joavan nga sagad na areglo tungod usab sa pag-intirbiner sa amahan nga mayor hinungdan nga sagad sa mga reklamante dili na interesadong mopasaka og kaso. (BANATNEWS)