2 na ang patay sa Leptospirosis
CEBU, Philippines - Gipahibawo karon sa City Assistant epidemiologist nga si Erlinda Macasucol nga duha na ka mga residente sa siyudad ang namatay sa sakit nga leptospirosis sa bulan lamang sa Mayo ug sa Hunyo.
Matud pa ni Macasucol nga ang labing uwahing namatay sa mao sakit mao ang usa ka Romel Abellanida, 25, niadtong Hunyo 2, 2010.
Sigon sa report, si Abellanida namatay human sa usa ka adlaw nga pag-admit niini sa Cebu City Medical Center kon CCMC.
Ang mga opisyales sa CCMC mitumbok nga ulahi na kaayo ang pagdala kang Abellanida diha sa hospital sanglit dihang ilang gisusi grabe na kaayong nakalamay sa lawas sa biktima ang kagaw sa leptospirosis ug dili na madala sa gidapat nga medisina.
Una nang gika-report dinhi sa Banat News nga may nakalas sa mao gihapong sakit sayo niining semanaha nga giila ni Macasucol nga si Jonathan Menchavez, 39, taga barangay Lahug ning siyudad sa Sugbu.
Si Menchavez na-admit sa CCMC niadtong Mayo 29 ning tuiga apan sigon pa sa mananambal wala na kini makaagwanta ug kini namatay niadtong Mayo 31.
Mipasidaan si Macasucol nga bisan og panahon sa ting-init aduna gihapoy nasinating mga panagsang pag-ulan sa milabay’ng mga adlaw nga gituuhang gumikan sa hugaw nga tubig diha makuha sa mga namatay ang maong kagaw.
Ang sakit nga leptospirosis makuha gikan sa mga hugaw nga tubig ilabi na sa lim-aw nga may mga hugaw gikan sa mga ilaga ug ubang mga hayop.
Subay niini, iyang gipahimangnoan ang publiko nga magpadayon sa paglimpyo sa ilang palibot ilabi na nga naghinangat na ang ting-ulan nga gipaabot magsugod karong bulana aron makalikay sa sakit nga leptospirosis ug sa sakit nga dengue. (BANATNEWS)
- Latest
- Trending