2 rebolto sa Santos gipunggotan sa kawatan

CEBU, Philippines - Duha ka ulo sa rebolto sa birhen ug ingon man ang kwartang limos sa pamisa ang nahanaw human gisulod sa wala mailhing mga kawatan ang opisina sa sekretarya sa Saint Michael Archangel Parish Church sa lungsod sa Samboan.

Ang kapolisan sa lungsod sa Samboan blangko pa gihapon pag-ila sa responsable sa mikawat sa ulo sa duha ka rebolto sa birhen nga giingong ginama sa ivory.

Si SPO1 Dominador Ferrolino, imbestigador sa Samboan Police station nga nahinabi sa Banat News mitug-an nga usa ka Michelle Dinopol, secretary sa Saint Michael Archangel Parish Church midangop sa ilang buhatan niadtong Lunes sa buntag aron magpa-blotter sa nahitabo.

Misaysay si Dinopol nga pasado alas-8 sa buntag niadtong Lunes pag-abot niya sa iyang opisina iyang nakita nga naguba na ang door knob sa pultahan sa iyang opisina.

Tungod niini iyaha dayong gisusi ang vault nga gisudlan sa P10 mil nga giingong kita sa pamisa sa simbahan apan kini giguba na.

Gawas sa P10 mil nga nahanaw, lakip sa gikuha ang duha ka ulo sa birhen ni Saint Veronica ug Blessed Virgin Mary nga ginama sa ivory nga gituyokan sa garing ang ulo sa duha ka santos.

Matud ni Ferrolino nagtuo si Dinopol nga gisulod ang iyang opisina sa wala mailhing tawo nianang tungang gabii sa Lunes o ba kaha kaadlawon apan walay nakamatikod kanila.

Si Ferrolino mitug-an nga sa ilang gihimong pasiunang pakisusi ilang nasuta nga posibleng diha moagi ang kawatan sa bangag sa aircondition unit nga gitaptapan lamang og light material ug sa dihang nakasulod na giguba ang door knob ug sa dihang naabli na gikuha ang nahisgutang salapi ug ulo sa duha ka birhen.

Apan kagahapon sa buntag, mibalik na sab si Dinopol aron sa pagpa-blotter pag-usab tungod kay lakip diay sa nahanaw mao ang duha ka paresan nga bukton sa rebolto ni Blessed Virgin Mary.

Kagahapon sa hapon si Ferrolino ug mga kaubanan niini miadto sa simbahan aron pakigkitaan ang kura paroko nga si Fr. Marion Mejia.

Wala usab isalikway ni Ferrolino ang posibilidad nga inside job ang nahitabo, wala pa hinuoy nasulti si Dinopol si kinsa ang gidudahan niini nga tawong magsulod-gawas diha sa iyang buhatan.

Wala pa usab matumbok sa kapolisan kun pila gyuy kinatibuk-ang kantidad sa duha ka ulo sa birhen ug duha ka bukton niini nga pulos ginama sa ivory. - BANAT NEWS