CEBU, Philippines - Gitinguha ni kanhi Dangerous Drugs Board (DDB) Undersecretary Paul Clarence Oaminal nga kahatagan og maayong panginabuhi ang mga ultimong drug pusher aron mokibra kun dili man ugaling hingpit nga masumpo ang suliran bahin sa gidiling drugas sa nasud.
Si Oaminal nga gitanyagan na ni Senator Elect Vicente Sotto III nga ibalik isip DDB Undersecretary misugyot niini human masuta niya nga sagad sa mga ultimong pusher maoy daling madakpan ug inig gawas nila sa prisohan dali ra kaayong mobalik sa ilang naandang bisyo tungod kay wala may laing kapaingnan aron mabuhi sa tinarong nga paagi.
Gipasabot ni Oaminal nga angay gyud untang tun-an kini sa kagamhanan kun unsang matanga sa livelihood program ang itanyag kanila aron sila mobiya sa ilang bisyo.
Masaligon si Oaminal nga padayong ikapatuman ang iyang nasugdang programa batok sa gidiling drugas ilabina dinhi sa Visayas ug Mindanao karong nahibalik na sa senado si Senador Sotto.
Gitumbok ni Oaminal nga iyang ipadayon ang pagpatuman sa Alternative Development Program for the Urban Barangays (ADPUB) nga mohatag og maayong panginabuhi alang sa mga tigpananom og marijuana sa mga kalungsoran dinhi sa Sugbo. Kini sa tinguha nga magtinarong na sila sa ilang pagpanguma ug maglikay na sa pagpananom og marijuana ug uban pang matang sa ginadiling drugas.
Midugang si Oaminal nga wala na siyay plano nga mogukod pa niadtong mga opisyal nga magbinuang kay mao kini hinungdan nga gitaktak siya sa katungdanan ni Presidente Gloria Arroyo niadtong Marso l9 ning tuiga. (BANATNEWS)