CEBU, Philippines - Patay ang usa ka lalaki human kini madagit sa usa ka prime mover cargo truck sa National Highway sa barangay Tunghaan, lungsod sa Minglanilla pasado alas 3:30 sa hapon sa milabay’ng adlaw.
Ang namatay mao si Ruben Lim Dumdum, 42, taga sitio Sta. Ana, dakbayan sa Toledo kinsa milabang sa dalan apan napunggit ug nalatayan sa trak de kargang gimaneho ni Funny Martinez Pafilan, 42. taga Tiglawan, Cadiz City nga drayber sa Top Feed Cargo Corporation nga nagbase sa Mandaue City.
Sumala pa ni PO1 Raymond Romarez sa Talisay City Traffic Division dihang nahinabi sa Banat News mibutyag nga gikan pa sa Toledo uban sa iyang inahan ang biktima aron mobisita sa kabanay sa barangay Tungkop, Minglanilla.
Sa paglabang ni Dumdum wala kini mabantayi sa drayber sa trak ug maayong pagkapunggit hinungdan sa naangkong mga grabeng pangos, bun-og ug mga samad sa tibuok lawas.
Ang biktima gisuwayan pa unta pagdala ngadto sa Minglanilla District Hospital apan gideklarar kining patay na.
Si Pafilan boluntaryong mitahan sa iyang kaugalingon ngadto sa kapolisan human sa hitabo. (BANATNEWS)