Lalaki gitabangan og pusil, namatay

CEBU, Philippines - Gitabangan og pusil patay ang usa ka 42-anyos nga lalaki diha sa sitio Seabreeze, barangay Dumlog siyudad sa Toledo niadtong Domingo sa alas 4:50 sa hapon.

Ang biktima mao si Fernando Aboredo Guillano Sr., 42, taga sitio Ipil-ipil barangay Dumlog samtang duha ka mga armadong lalaki ang gitumbok nga mipatay sa biktima nga wala pa mailhi sa kapulisan.

Matud ni PO1 Florante Cayson sa Toledo City Police dihang nahinabi sa Banat News misuroy ang biktima sa maong lugar aron pagtambong og kalingawan nunot sa nagsingabot nga kapistahan.

Apan kalit lang giduol kini sa mga mamumuno nga armado og improvised shotgun ug ang usa armado og kalibre .38 dayong pusil sa biktima sa liog ug tuong abaga.

Patay diha-diha si Guillano samtang ang duha daling nakasibat pahilayo.

Apan paghiling sa mirespondeng mga polis nakuha sa posesyon sa nagbuy-od nga biktima ang usa ka kalibre .357 nga armas sa hawakan niini.

Atraso ang gitutukang motibo sa krimen, gisusi na usab sa kapulisan ang record sa biktima tungod sa kahibulong nganong aduna kini armas. (BANATNEWS)