CEBU, Philippines - Naglaraw si Mayor Tomas Osmeña ug karon congressman-elect sa south district nga doblehon ang presyo sa yuta sa South Road Properties kun SRP aron mahatagan og kasulbaran ang dugang galastuhan sa siyudad sa umaabot nga katuigan.
Matud pa ni Osmeña sa interbyu sa DyRF nga iyang nakitang mabug-atan ang kagamhanan sa siyudad sa Sugbu sa galastohan alang sa pagpadayon sa scholarship program sa high school graduates dinhi sa siyudad sa Sugbu aron mopadayon og tungha sa kolehiyo.
Kini tungod kay magkataas matag tuig ang gidaghanon sa mga tinun-an nga paeskuylahon sa siyudad karong mosunod nga tuig.
Dili buot sa mayor nga maputol ang maong programa dinhi sa siyudad bisan og dili na siya ang mayor sa siyudad sa Sugbu hinungdan nga iyang tabangan ang napiling bag-ong mayor nga si Vice Mayor Michael Rama kinsa moasumir na pagkamayor sa dakbayan.
Si Osmeña nagkanayon nga ang "focus" unya sa iyang paglingkod isip kongresista sa Cebu City South District mao nga daling pagkahalin sa mga luna sa SRP.
Dugang pa sa mayor nga dili siya maproblema sa pagbaligya niini bisan pa doblehon ang presyo sanglit daghan man ang mag-apas nga investors nga mopalit unya niini sa higayon nga magsugod na ang development sa maong lugar. (BANATNEWS)