BOPK nangharos giproklamar na

CEBU, Philippines - Pormal nang giproklamar kagahapon ang mga kandidato nga mikuha og labing taas nga mga boto sa dakbayan sa Sugbo atol sa gipahigayong piniliay niadtong Mayo 10.

Si Mayor Tomas Osmeña mao’y giproklamar nga kongresista sa South District nga mikuha og 128,575 botos, samtang ang kaatbang niini nga si Jonathan Guardo mikuha lang og 67,652 botos.

Si Rachele Marguerite del Mar usab maoy naproklamar nga kongresista   sa North District sa botos nga 98,501, samtang ang kaatbang niini nga si Mary Ann delos Santos nakakuha lang og 58,492 botos.

Giproklamar usab isip Mayor sa Sugbo si Vice Mayor Michael Rama nga mikuha og 210,520 botos, samtang 120,327 botos lamang ang kang kanhi mayor Alvin Garcia ug ang kang Georgia Osmeña 16,620 ra usab.

Si Joy Young sa BOPK mao usab ang gideklara nga bise-mayor dinhi sa syudad sa Sugbo nga mikuha og 226,736 botos kontra sa kaatbang niining si   Rodolfo Cabrera nga nakakuha lang og 59,990 botos.

Samtang ang kandidato sa pagka-konsehal sa BOPK sa duha ka distrito sa syudad pulos usab nangharos sa kadaugan diin nag-una kanila sa north district mao si Edgardo Labella nga may 105, 338 botos, Augustus Jun Pe 97, 546, Alvin Arcilla 91,096, Sisinio Andales 85,880 Lea Japson 84,615, Alvin Dizon 82,274,Noel Wenceslao 79,779 , ug Nida Cabrera 75,018.

Sa South District nag-una usab si Rodrigo Abellanosa- nga may 127,676 botos, Margot Osmeña-126, 745, Eduardo Rama- 121, 340 Jose Daluz III- 114,603 Raul Alcoseba- 113,370 Ronald Cuenco- 102,742 Richard Osmeña- 97,274 ug Roberto Cabarrubias- 92, 668.

Atol sa adlaw sa canvassing, wa gyud hinuon kalikayi ang kalangay hinungdan gumikan sa kahinay sa pag-transmit sa ubang barangay sa dakbayan milungtad og tulo ka adlaw ang pag-inihapay hinungdan nga gi-mano-mano ang uban niini.

Apan luyo sa kalangay nga nasinati, malampuson gyud nga nadeklarar ang mga mananaog.  –BANAT NEWS