CEBU, Philippines - Human ibasura sa Cebu City Prosecutors ang kasong murder batok kang Ricardo Reluya, bana sa mayor sa lungsod sa San Fernando, ang naulahi mibahad nga mosumbalik siya og kiha batok sa mga Canoy nga kaatbang sa iyang asawa karon sa politika.
Si Reluya mipasangil kang Bise Mayor Antonio “Abby” Canoy nga maoy nagpaluyo sa pagpasaka og kasong murder batok sa pinaagi ni Luis Apawan Jore, amahan sa negosyanteng si Louella Jore kinsa gipatay sulod sa iyang tindahan pipila na ka tuig ang milabay.
Sa press conference kagahapon sa buntag sa White Gold House sa Reclamation Area, dakbayan sa Sugbo mipatim-aw si Rolando Danilo Bajao kinsa giingong gi-hire sa kampo sa mga Canoy sa pagpatistigo batok kang Reluya .
Didto gibutyag ni Bajao nga niadtong Marso 4, 2010 nakigtransaksyon siya sa mga Canoy nga motestigos siya batok kang Reluya.
Unya gitanyagan siya og P30 mil nga bayad apan P15 mil ray giuna, unya gidatadatahan nalang siya og tagidyot.
Gumikan kay nakonsensiya siya sa iyang gibuhat, mitug-an siya sa tinuod ngadto kang Reluya nga siya gisuholan lang ni Canoy bisan wala siyay nasayran bahin sa kamatayon ni Jore. – BANAT NEWS