CEBU, Philippines - Nakabsan sa iyang kinabuhi ang kandidato sa pagkakonsehal nga nalambigit sa kontrobersya karon kang Bise Mayor Michael Rama nga si Crisostomo Llaguno alyas Tata Negro samtang nangampanya diha sa karaang ihawan sa barangay Lorega-San Miguel ning dakbayan kagahapon sa hapon.
Usa ka gituohang hired killer ang nasikop sa Special Weapons and Tactics (SWAT) sa Cebu City Police Office (CCPO) nga giilang si Jimmy Dialia, taga lungsod sa Siaton, Negros Oriental ang nadakpan dili layo sa gihitaboan.
Ang suspek nakuhaan og kalibre .45 nga pistola nga gituohang maoy iyang gigamit pagpusil kang Llaguno. Si Llaguno, 35, nga taga sitio Kawayan, B. Rodriguez, barangay Sambag II, dakbayan sa Sugbo nakaangkon og mga samad pinusilan sa liog, dughan, walang bahin ug ubos nga bahin sa tiyan daling gidala ngadto sa Chong Hua Hospital.
Si SPO4 Alex Dacua sa Homicide Section mikumpirmar kagabii nga nakabsan sa kinabuhi si Llaguno.
Usa ka Pedro nga nakasaksi sa hitabo miingon nga samtang nagkupot ang biktima ngadto sa kamot sa suspetsado gipusil dayun kini duha ka higayon, human matumba milakaw ang suspek apan dihang nalingiang mikamang kini gibalikan kini sa suspek ug giusban og pusil tulo ka higayon.
Samtang usa ka tindera sa maong dapit mibutyag nga pasado alas-2 palang sa hapon mihapit ang suspek ug nagpa-load og 50 pesos ug mipalit og usa ka botelyang beer, dihang miabot si Llaguno mibiya usab ang maong suspek sa tindahan.
Ang suspetsado gitabangan og gukod sa mga estambay ug misuway og sakay og jeep pasaheroan apan pag-abot sa Zapatera Elementary School nasikop gihapon kini sa SWAT.
Matud pa ni SPO1 Jeoffrey Diola, usa sa mga nangutana sa suspek kini nangangkong ‘nasina’ lang siya kang Llaguno nga nahimo nang adunahan. Apan ang kapolisan nagdudang hired killer ang suspek.
Si Cebu City Police Office director Patrocinio Comendador mibutyag nga ang ilang gisubay nga anggulo mao ang kalambigitan ni Llaguno sa illegal nga drugas ug personal nga bangi. Apan ang pamilya kusganong mipadayag nga may kalambigitan sa politika ang gidangatan ni Llaguno. – BANAT NEWS