Gibo subling manguyab sa mga sugbuanon karong adlawa

CEBU, Philippines - Si Lakas-Kampi-CMD presidential bet Gilbert “Gibo” Teodoro mobalik sa Cebu karon aron paduyonon pagpanguyab ang mga Sugboanon nunot sa pagbarog sa 56 ka mga gobernador, uban sa mga mayor nga mideklarar sa Sugbo nga “Gibo country.”

Kini nadungan sa pagtungtong niya sa survey sa mga online mock polls ug mga non-mainstream surveys karon nga duha na lang ka semana sa dili pa ang Mayo 10 eleksiyon.

Si Teodoro nag-una sa survey sa BusinessWorld ug Manila Bulletin ug ikaduha sa bulag nga survey sa Makati Business Club, ING Bank, ug Campaigns and Image Group nga nagbase sa Sugbo.

Sa miaging semana, si Teodoro mianhi sa Cebu aron tambungan ang pinirmahay og manifesto sa mga gobernador pinanguluhan ni Gob. Gwendolyn Garcia alang sa Governors for Gibo (G4G) o Team Palabra de Honor sa Marco Polo Hotel.

Gawas nila, mga 168 ka congressional candidates, 71 kanila mga incumbent sa Kongreso, mipadayag og suporta kang Teodoro sa panagtigum sa Dusit Thani Hotel sa Makati City, nga gihimo usa ka adlaw sa wala pa ang meeting sa Marco Polo. 

Si kanhi Press Sec. Mike Toledo mitataw nga dako og gikatabang ang campaign machinery sa Lakas-Kampi-CMD ug ang nagkalapad nga suporta sa mga batan-on hinungdan sa pagkahimo niyang “people’s candidate.”

Magsugod ang pagpangampanya ni Teodoro sa Sugbo sa Minglanilla diin siya maoy dinapit sa General Assembly sa mga Barangay Health Workers sa Minglanilla Sports Complex. 

Molahos siya sa Toledo aron tambungan ang blessing ug unveiling sa marker sa New Toledo Garden City Hall ug awarding sa PJ Cup. 

Human sa paniudto, si Teodoro molupad paingon sa Daanbantayan, moduaw sa Medellin aron tambungan ang Sinulog Mardi Gras sa Medellin Stadium ug molahos sa Bogo alang sa laing campaign rally ug sundan kini sa rally sa Danao ug Lapulapu ini’g ka gabii.

Ugma, si Teodoro moadto sa Camotes Island ug Bantayan Island sa buntag; Dumanjug ug Argao sa hapon. 

Motak-op ang kampanya ni Teodoro sa Sugbo pinaagi sa usa ka grand rally ugma sa gabii sa Mandaue city. (BANATNEWS)