Cang wala mamolitika

CEBU, Philippines - Gipanghimakak ni Konsehal Tessa Paradiang-Cang sa lungsod sa Compostela ang pasangil nga gigamit niya ang mini-dump truck sa kagamhanan sa dakbayan sa Sugbo sa pamolitika hinungdan nga nadisgrasya kini sa miaging semana didto sa Compostela.

Matud pa ni Cang nga dihang nakadasmag og motorsiklo ang maong mini dump truck, hubog ang drayber niini nga si Apolinario Bataclan Jr. Apan gipanghimakak ni Cang nga hubog usab siya sa pagka-disgrasya sa sakyanan.

Hinuon walay namatay o kaha naangol sa maong hitabo, apan gibasol niya ang drayber niini kay bisan nakalala og ilimnong makahubog mipa-alig-alig gyud og maneho sa sakyanan.

Matud pa ni Cang nga miduol siya kang konsehal Yayoy Alcoseba sa dakbayan sa Sugbo, ug mihangyo nga mogamit og boxing ring kay may pasundayag sila nga boxing didto sa Compostela.

Apan tungod kay wala man silay sakyanan, gipagamit usab ni Alcoseba ang mini dump truck kay maoy gikargahan sa boxing ring paingon ngadto sa barangay Tamiao, Compostela diin didto ipahigayon ang kalingawang boxing niadtong Huwebes.

Kini tungod kay matud pa ni Cang nga daan nang misaad si Alcoseba, isip chairman sa Cebu City Sports Commission, nga mopagamit sila og boxing ring, ug uban pang mga kahimaman sa paugnat sa kusog nga iya sa kagamhanan sa dakbayan   basta adunay mga kalihukan nga boxing sa bisan asang lungsod, siyudad, o kaha lalawigan sa bisan asang rehiyon sa Kabisay-an.

Gipasalig hinuon ni Cang nga sila nay manubag sa kadaot nga nahimo sa maong disgrasya ilabi na sa motorsiklong nadasmagan niini. – BANAT NEWS