CEBU, Philippines - Nag-anam na ka mangtas ang mga tulisang de motor kay dili na ordinaryong mga butang ang ilang tulison karon kundili mga motorsiklo na gayud kay dagko ang ilang masapi, sumala sa kapolisan sa dakbayan sa Talisay.
Ang labing bag-o nga nasakiyohan og motorsiklo mao si Baby Abellana, 43, minyo nga taga Area 5, Urban Poor, sa barangay Lower Maghaway, dakbayan sa Talisay.
Didto sakmita sa duha ka wala hiilhing tulisan ang motorsiklo sa biktima sa Uldog Street, barangay Poblacion, dakbayan sa Talisay sa miaging gabii.
Ang biktima nga nagtibi atubangan sa kapolisan nagkanayon nga samtang nagpadagan siya sa iyang motorsiklo, kalit lang gibabagan siya sa duha ka tawong armado nga nagsakay usab og motorsiklo.
Sa paghunong sa biktima gitionan dayon siya og armas de fuego sa backrider sa motorsiklong mibabag kaniya ug mideklarar nga gikinahanglan niya ang motorsiklo sa biktima.
Ang naulahi nga nagpangurog sa kakuyaw nga makabsan siya og kinabuhi, mihatag nalang nga nagkusmod sa iyang sakyanan nga gisakyan usab dayon sa usa sa duha ka tulisan dayong pasirit ngadto sa layo.
Misumbong dayon siya sa kapolisan ug ang mga otoridad sa Talisay nagkapuliki na karon sa pagpangita sa maong mga tulisan.
Matud nila nga bantayanan na karon sa mga drayber sa habal-habal ang maong tulisan kay sila nay rumbo niini. (BANATNEWS)