CEBU, Philippines – Gibasura sa piskalya ang kasong libelo nga gipasaka ni Frater Martin kansang tinuod nga pangalan mao si Venancio Cabillon batok nila ni Cebu Arch Bishop Ricardo Cardinal Vidal ug ubang opisyales sa simbahan.
Si Provincial Prosecutor Pepita Jane Petralba nagkanayon nga daghang kuwang sa pasangil ni Cabillon aron matawag nga pagpangdaot sa pagkatawo sa naulahi ang notisyang gipublikar sa Bag-ong Lungsoranon.
Sumala pa niini base sa counter-affidavits sa mga gikiha nga naglakip nila ni Abelio Mangila nga nailang si Frater Martin Mary sa Marian Monks of the Eucharistic Adoration, Rev. Fr. Marnell Mejia ug Rev. Msgr. Cristobal Garcia, igo ra silang mipahibalo sa tumutuo sa simbahan pinaagi sa notisya nga dili na konektado si Cabillon sa MMEA. Ang maong notisya napublikar niadtong Agosto 9, 2009 apan giisip kini ni Cabillon nga pagpakauwaw sa iyang pagkatawo.
Sumala pa sa resolusyon sa piskalya nga ang kasong libelo kinahanglan ang mosunod nga mga elemento: it must be defamatory, it must be malicious, it must be given publicity, ug the victim must be identifiable. Bisan usa lamang niini ang wala dili makunsiderar ang kasong libelo.
“Looking at the questioned article as a whole, it appears nothing more than a simple notice of disconnection of a certain individual from a certain group,” matud pa sa resolusyon.
Samtang sa report sa Balitang Bisdak gikatahong gi-dismiss usab ang kasong estafa nga gipasaka batok kang Cabillon kabahin sa pagdawat niini og mga donasyon sanglit migawas nga wala ipamugos sa gikiha ang pagkuha niini. - Edwin Ian Melecio (BANAT NEWS)