4 Cebuano artists gipasidunggan

CEBU, Philippines - Gipasidunggan ni Presidente Gloria Macapagal Arroyo ang mga Cebuano artists diha sa National Commission for Culture and the Arts (NCCA) 2nd Ani ng Dangal Awards nga gihimo niadtong Pebrero 26 diha sa Malacañang Palace's Rizal Hall sa Manila. Ang mga gipasidunggan mao ang choral groups sa University of the Visayas Chorale ug ang Mandaue Children's Choir, hip-hop group Dice Mobbstarr ug photographer Erwin Lim .

Ang NCCA mipasidungog sa 41 ka awardees gikan sa nagkadaiyang arts, 12 niini sa musika, siyam sa film, pito sa multidisciplinary arts, unom sa visual Arts, upat sa sayaw, ug duha sa literature.

Ang mga awardees gihatagan sa Ani ng Dangal tungod sa ilang maayong nahimo sa global stage. Ang tanan nakadawat og mga gold medals ug nanguna sa mga international competitions sukad pa niadtong Nobiyembre 2008 hangtud Nobiyembre 2009.    

Ang UV Chorale usa sa mga giilang chorale group sa kalibutan nga mihakot og tulo ka bulawang medalya sa Tomohon International Choir Competition sa North Sulawesi, Indonesia niadong Hunyo 2009.  

Samtang ang Mandaue Children's Choir naapil sa mga misulbong nga kampeyon sa Children’s Choir Category sa First World Choir Championships sa Gyeongnam Province, Republic of Korea niadtong Hulyo 2009.

Ang Dice & K9 Mobbstarr mao ray nag-inusarang hip-hop artist nga nakasulod niining tuiga human modaog ug gipasidunggan isip Best Hip-Hop Group nga nakigtabla sa Thaitanium sa nasud sa Thailand sa labing unang Independent Asian Music Awards (AVIMA) sa Malaysia niadtong Marso 2009. Ang Dice & K9 Mobbstarr gilangkuban ni Dice (Wolfren Rosaroso), Hi-C (Honeyleen Concepcion-Rosaroso) ug Klumcee (Lester Van'o).

Samtang si Erwin Lim naapil sa listahan sa visual artists sa ASEAN Tourism Association Awards for Excellence (sa Vietnam niadtong 2009) ug gipasidunggan tungod sa litratong iyang gikuha sa PAL isip best tourism shot.

Ang tanang upat ka Cebuano awardees gikuyogan sa mga inilang mga artists nga sila si Brillante Mendoza (62nd Cannes Film Festival–Best Director for Kinatay), Pepe Diokno (66th Venice International Film Festival–Lion of the Future Luigi De Laurentiis Awardee for a Debut Film, ug Orizzonti Award Best Film for Engkwentro), Gina Pareño (3rd Asian Film Awards–Best Supporting Actress for Serbis), ug Rhap Salazar (13th World Championships of Performing Arts–Grand Champion Performer of the World, and Champion, Vocal–Junior Division).

Ang pagpanghatag og Ani ng Dangal Awards gipasiugdahan sa NCCA subay sa National Arts Month sa bulan sa Pebrero diin ang mga gihimo ug gipanghimo sa mga gipasidunggan i-display sulod sa usa ka buwan.   (Edwin Ian Melecio)    (BANATNEWS)