Kiriwan og kabli di pasayloon

CEBU, Philippines - Dili makapasaylo ang Visayan Electric Company (VECO) sa mga kawatan sa ilang kabli nga maoy naghatag og kabug-at karon sa suliran bahin sa kuryente gawas sa rotation brown out.

Kini sa dihang usa sa mga kiriwan og kabli sa Veco nadakpan didto sa barangay Mabolo, ning dakbayan sa Sugbo niadtong Lunes sa kaadlawon.

Giila sa kapolisan ang suspetsado nga si Roldan Abandan, 42, nga taga Mabolo.

Si Ethel Natera, tigpamaba sa Veco nagkanayon nga mao kini dakong problema nga ilang giatubang karon tungod sa paghasi sa mga kinawatay sa ilang mga kabli, gawas sa padayong kanihit sa suplay sa kuryente nga maoy hinungdan sa subsob nga brown out matag adlaw.

Matud pa niya nga usa kini sa hinungdan nga may mga lugar nga kanunay’ng walay suga bisan wala mahilakip sa schedule sa brown out, kay gumikan sa pagkawala nay kabli sa kuryente sa ilang lugar kay gipangawat sa mga kiriwan.

Busa si Abandan nga nagtingkagol na karon sa prisohan sa kapolisan sa Mabolo, pasakaan gyud og kaso aron magsilbing leksyon niadtong ubang mga tawo nga buot mangawat sa mga butang nga iya sa Veco, matud ni Natera.

Ang maong suspetsado maoy gitumbok sa mga saksi nga mikawat sa mga kabli sa VECO diha sa may eskina sa dalan Jaico ug Sindulan sa Mabolo alas 3:00 sa kaadlawon niadtong Lunes.

Si Lumie Bucay usa ka barangay tanod sa maong lugar maoy nakadakop kang Abandan kauban sa usa ka ginganlan og Eric sa akto nga gipamutol niini ang kabli sa VECO.

Hinuon si Eric nga dali kaayong mikabad og dagan pagkakita niya sa tanod, wala hidakpi sa maong higayon.

Nakuha gikan sa mga kamot ni Abandan ang taas nga kutay sa kabli sa VECO ingon man ang cutter ug gabas nga gigamit niya sa pagpamutol sa maong mga kabli.    (BANATNEWS)