CEBU, Philippines - Tulo ka tawo ang arestado sa buy-bust sa City Anti-Illegal Drug Special Operation Task Force sa Mandaue City Police Office (MCPO) sa San Jose 1 sa barangay Labogon sa dakbayan sa Mandaue kagahapon sa kadlawon. Ang nasikop mao si Concordio Manatad, 37, minyo residente sa maong dapit diin nakuhaan og usa ka gamay’ng pakete sa gituhuang shabu ug ang marked money nga P250.
Samtang nasikop usab sila si Charlie Besabella, 43, ug ig-agaw niini nga si Virgilio Besabella, 24, human makuhai sa ilang posesyon og duha ka gagmay’ng pakete sa gituhuang shabu.
Matud pang Insp. Raymundo Rodriguez, si Manatad walo na ka tuig nga namaligya og illegal drugs sa maong dapit ug sa dihang ilang nasayran nga bag-o lang nakapalit og ‘bulto’ sa shabu sa dakbayan sa Sugbu ila dayon kining gipahigayonan og buybust operation. Si Manatad lakip sa watch list sa kapolisan. - Bong Soriano (BANAT NEWS)