Giluba sa silingan namatay

CEBU, Philippines - Namatay ang usa ka lalaki human kini dunggaba sa iyang silingan sa barangay Sac-sac, lungsod sa Pinamungajan sa miaging gabii.

Ang biktima mao si Rey Baraga, 39, minyo, ug usa ka operator sa printing press, nga taga barangay Sac-sac sa nahisgutang lungsod.

Samtang ang suspetsado giila nga si Diony Diacamos, 19, ulitawo silingan ug amigo sa biktima.

Si PO2 Gilfred Baroman sa Pinamungahan Police Station nga nahinabi sa Banat News  mibutyag nga ang biktima ug ang suspetsado kauban sa ilang mga barkada naglakaw sa karsada gikang namiyesta ug nanisko sa silingang barangay sa Upper Mongota.

Dihang nagkalalis ug nagkainitay ang suspetsado ug ang biktima kinsa gituohang nakainom na og ilimnong makahubog.

Gumikan sa kainit sa maong lalis, kalit lang nga giluba sa suspetsado ang biktima sa makadaghang higayon sa nagkalain-laing parte sa lawas niini.

Gidali paghatod sa mga kauban ang biktima ngadto sa Pinamungajan District Hospital apan patay na kining miabot sa maong tambalanan.

Hinuon nadakpan usab dayon ang suspetsado uban sa kutsilyong gigamit niya sa pagpangluba pinaagi sa hot pursuit operation nga gihimo sa kapolisan sa Pinamungajan nga gipangulohan ni PO3 Delbert Barera uban nila ni PO2 Dominic Pantajo ug PO1 Wadden Teologo.

Nagtingkagol na karon sa Pinamungajan detention cell ang suspetsado samtang gihikay pa sa kapolisan ang kaso batok sa maong suspetsado.  - Raymond D. Abarcas  (BANAT NEWS)