^

Banat Balita

Gilugos sa 3 ka igsuon, nabuntis

- Ni Guam Logroño -

CEBU, Philippines - Usa ka minor de edad midangop sa asawa sa usa ka barangay kagawad sa usa ka bukirang barangay sa Danao human gitabangan ug gipulipulihan og lugos sa tulo niya mga maguwang nga lalaki nga ang usa minor de edad usab.

Ang biktima nagpangidaron og 14-anyos apan miundang na pagtungha sa first year high school ug giatiman na karon sa mga sakop sa Department of Social Welfare and Development (DSWD) sa Danao human gi-turnover sa ilang mga opisyal sa barangay niadtong Lunes. Gikatahong manganakay ang biktima sulod ning bulana.

Usa ka concerned citizen nga taga dakbayan sa Danao mipahibalo sa Banat News ug mipadayag sa iyang kahingawa sa nahidangatan sa maong minor de edad.

Matud pa niini nga niadto pang milabay’ng bulan mipahibalo ang biktima ngadto sa asawa sa ilang barangay kagawad sa dihang gipangutana kini kun nganong nabuntis nga wala man kini bana.

Apan gumikan kay nagpanagana usab ang kagawad tungod sa kahadlok nga ang mga suspetsado dunay mga dautang rekord sa ilang lugar wala gilayon kini ma-report sa kapolisan.

Gibutyag niini nga ang minor de edad mitug-an sa asawa sa kagawad nga gipulipulihan lang siya og lugos sa iyang tulo ka mga igsuon, ang maguwang minyo na, ang ikaduha ulitawo pa, ug ang ikatulo 16-anyos pa ang edad.

Giingong lugoson siya samtang ang iyang amahan wala sa ilang panimalay gumikan sa kabisi sa negosyo nga baboy sa merkado sa Danao ug ang inahan usab niini dunay deperensya sa pangisip.

Niadtong milabay’ng adlaw, usa ka staff sa Banat News pamantalaan ang nasuroy diha sa dakbayan sa Danao ug sugo sa higayon nagka-estoryahanay sila labot sa maong insidente.

Human sa ilang panag-estorya, iyang gipahibalo ang kapitan sa maong barangay ingon man ang kagawad nga ilang ireklamo sa kapolisan ang maong insidente ug tabangan ang biktima.

Niadtong Lunes, ilang gitabangan ang biktima ug gi-turnover sa kapolisan nga gitabangan usab sa DSWD-Danao.

Dugang pa niini nga nahadlok ang biktima nga mobutyag sa maong insidente ngadto sa iyang mga kaliwat, samtang ang amahan usab mahadlok usab ngadto sa iyang mga anak sanglit mga isog kini, ingon man nalambigit sa pagpananom og marijuana sa ilang lugar.

Gipanghinaot hinuon sa nagpakabanang residente sa lugar nga ma-aksiyonan sa kapolisan ang kaso ug madakpan ang tulo ka mga suspetsado sanglit nahadlok sila nga makasibat diha sa ilang lugar human mabutyag ang linuog nilang binuhatan.

Ang Banat News misulay’g kuha sa habig ni PO2 Cherry Cañares sa Women’s Desk sa Danao Police Station apan nagdumili kini sa paghatag og detalye sa maong insidente sanglit wala pa makahatag og affidavit ang biktima.

Si PO2 Cañares mipasabot nga ‘confidential’ ang maong isyu.

Dugang pa niini nga ila pa usab nga gipa-eksamin sa DSWD ang biktima kagahapon ug gani ilang gipreparar ang pagpasaka og kaso niini sa korte.

Si Sr. Supt. Jesus Gaquing Jr. nagkanayon nga wala makaduso og report ang Women’s Desk sa Danao Police Station tungod sa padayong imbestigasyon.

Matud ni Gaquing nga gipaubos pa sa eksaminasyon ang biktima una pa ipasaka ang kaso batok sa tulo ka igsuon niini. – BANAT NEWS

BANAT NEWS BIKTIMA CHERRY CA DANAO DANAO POLICE STATION DEPARTMENT OF SOCIAL WELFARE AND DEVELOPMENT DUGANG ILANG
  • Latest
  • Trending
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with