Osmeña, delos Santos nag-abot sa Lahug protest

CEBU, Philippines - Nagkahiusa ang higpit nga managkaribal sa politika dinhi sa dakbayan sa Sugbu kagahapon sa buntag human milusad og silent protest atubangan nga bahin sa University of the Philippines (UP) ang mga residente nga nasunogan sa sitio San Jose sa barangay Lahug. Gibanabanang moabot ngadto sa kapin sa usa ka gatos ka tawo ang nilusad og silent protest batok sa administrasyon sa UP nga nagdala'g placards nga nagkondenar sa pagpakural sa ilang gipuy-an.

Pipila sa mga plakang gidala sa mga residente nag-ingon “Asa naman mi karong Pasko?” Lakip sa miduyog sa maong lihok protesta mao ang mga sakop sa UP Student council nga gipangulohan sa presidente nga si Ana Desamparado.

Kagahapon unang naabot sa area si City Administrator Bimbo Fernandez, dayon miabot usab si Kongresista Raul del Mar uban sa iyang anak nga si Cutie.

Wala usab madugay miabot si Kapitan Mary-Ann delos Santos dayon si Mayor Tomas Osmeña, ang panag-abot sa duha nakapalingi sa mga tawo sa palibot, si delos Santos maoy unang miduol ug milamano sa mayor. Pakyas ang mga opisyal sa pakighinabi sa dean sa maong tunghaan nga si Enrique Avila tungod kay tua kini sa kaulohan.

Apan si del Mar nagkanayon nga nagkasabot na sila ni Avila niadtong Biyernes sa buntag nga dili na niini ihinayon ang pagpakural sa luna ug pabalikon pagtukod ang mga apektadong mga residente sa ilang balay.

Samtang sa iyang bahin si delos Santos nagpasalamat nilang del Mar ug Osmeña nga nibarog aron dili mapapahawa ang mga residente nga nasunogan, si delos Santos una nang mipasalig sa mga apektadong pamilya nga dili sila mapapahawa.

Si Osmeña wala na mohatag og komentaryo sa iyang pagbisita sa mga nag-silent protest tungod kay iya nalang gitugyan ang tanan kang Fernandez sanglit mao kini iyang gitahasan sa tanang gimbuhaton ug problema nga anaa sa gawas sa iyang buhatan. – BANAT NEWS