Alvin Flores gusto untang magpakababaye

CEBU, Philippines - Usa ka doctor mibutyag sa usa ka tigbalita sa GMA News nga dugay na siyang gihangyo ni Alvin Flores, ang usa ka bantugang lider sa mga tulisan nga magpausab sa dagway nga sama kang Rustom Padilla.

Ang maong doctor nga giilang si Dr. Dominador Pedracio mibutyag nga miduol kaniya si Flores nga nagpabayot-bayot ug mihangyo nga gusto gyud niyang mausab ang iyang dagway ngadto sa usa ka nawong sa guwapang babaye.

Apan miingon si Pedracio nga gibalibaran niya si Flores kay dili siya usa ka magikero nga makahimo pag-usab sa dagway sa usa ka tawo sa usa lang ka pamilok.

Miingon si Pedracio nga wala usa’y gihatag nga katarungan ug hinungdan si Flores nganong magpausab siya sa iyang dagway.

Apan matud pa ni Pedracio nga wala gyud siyay kalibotan niadtong higayona bahin sa tinuod nga pagkatawo ni Flores ug diha na niya hisayri nga ang miduol kaniyang tawo usa diay ka banggiitang tulisan dihang gipakita kaniya sa taga National Bureau of Investigation (NBI) ang dagway ni Flores paghiabot niini sa nasud gikan sa gawas.

Midugang si Pedracio nga labi pa gyud niyang nasuta ang tanan dihang nakita niya ang patay’ng lawas niini, matud pa ni Pedracio dihang gipakonpirmar siya sa taga NBI bahin kang Flores.

Ang pagbutyag ni Pedracio bahin sa gihangyo kaniya ni Flores gihimo human mapatay sa mga tinugyanan sa NBI ang naulahi uban sa laing tulo niya nga sakop nga tulisan sa barangay Estaka, Lungsod sa Compostela, Cebu niadtong naghinapos ang buwan sa Oktubre. ((Wen Celen)